ދިވެހި މަހުގެ އުފެއްދުންތަކަށް އިތުރު މާކެޓްތައް ހޯދުމަށް މަސައްކަތް ކުރަމުން އަންނަ ކަމަށް މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ކޯޕަރޭޝަނުން ބުނެފި އެވެ.
އެ ކުންފުނީގެ މެނޭޖިން ޑިރެކްޓަރު އަޙުމަދު ޒަރީރު ވިދާޅުވީ ކުންފުނީގެ އިދާރީ އޮނިގަނޑު އެކުލަވާލައި، ކުރިއަށް ރާވަމުންދާ މަސައްކަތުގެ ޕްލޭންތައް ތައްޔާރު ކުރަމުން އަންނަ އިރު، އެންމެ ބޮޑު އިސްކަމެއް ދޭ އެއް ކަމަކީ ދިވެހި މަސްވެރިން ބާނާ މަސް ރާއްޖެއިން ބޭރުގެ ބާޒާރުތަކަށް އިޝްތިހާރު ކުރުމުގެ މަސައްކަތް ކަމަށެވެ. އަދި އެކަން މިހާރު ވެސް ކުރިއަށްދާ ކަމަށް ވިދާޅުވި އެެވެ.
"ހަމައެހެންމެ ދިވެހި މަހުގެ އުފެއްދުންތަކަށް އަޅުގަނޑުމެން އިތުރު މާކެޓްތައް ހޯދުމަށް ވަރަށް އިސްކަން ދޭނަން. މިހާރު ދިވެހި މަސްކުންފުނިތަކުން ބައިވެރިވަނީ މަދު ފެއާތަކުގައި،"ޒަރީރު ވިދާޅުވި އެވެ. "އަދި މައުނަވީ ގޮތުގައި އެ ފެއާތަކުގައި ޕްރޮމޯޝަންގެ މަސައްކަތް ކުރިއަށް ނުދޭ. އެހެންވީމާ މި ކަންކަން ރަނގަޅުކުރުމަށް އަޅުގަނޑުމެން މަސައްކަތް ކުރާނަން."
އޭނަ ވިދާޅުވީ ސަރުކާރުން މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ކޯޕަރޭޝަން އުފެއްދީ ވެސް ދިވެހި މަސްވެރިކަމުގެ ސިނާއަތު ކުރިއެރުވުމަށާއި، މަހުގެ އުފެއްދުންތަކަށް އައު ބާޒާރުތައް ހޯދުމަށް ކަމަށެވެ. އެހެންވެ މި ކުންފުނިން ކުރިއަށް އޮތް ތަނުގައި ދިވެހި މަހުގެ އުފެއްދުންތަކަށް ބޭރުގެ ބާޒާރުތަކުގައި އިތުރު ޝައުގުވެރިކަން އުފެއްދުމަށް މަސައްކަތް ކުރާނެ ކަމަށް ވިދާޅުވި އެވެ.
ރާއްޖޭގައި ދެވަނަ އަށް އިގުތިސާދީ މައިގަނޑު މަސައްކަތުގެ ތެރޭގައި ހިމެނޭ މަސްވެރިކަން އިޝްތިހާރު ކުރަން، މޯލްޑިވްސް ފިޝަރީޒް އެންޑް އޯޝަން ރިސޯސަސް މާކެޓިން އެންޑް ޕްރޮމޯޝަން ކޯޕަރޭޝަން އުފެއްދީ މި އަހަރުގެ ފެބްރުއަރީ 4 ގަ އެވެ.
އެ ކުންފުންޏަށް މި އަހަރު 37 މިލިއަން ރުފިޔާގެ ބަޖެޓެއް ކަނޑައަޅާފައިވެ އެވެ.