އައްޑޫ ހިތަދޫގައި ބިނާކުރަމުން އަންނަ އިސްލާމީ މަރުކަޒުގެ މަސައްކަތް ކުރިއަށްދާ ސްޕީޑް ލަސް ކަމަށާއި އެހެންވެ މިހާރު ލަފާކޮށްފައި އޮތް ގޮތުން އެ މަސައްކަތް ނިމޭ ވަރު ވާނީ އަންނަ އަހަރުގެ ނޮވެމްބަރު ހިސާބުގައި ކަމަށް އިސްލާމިކް މިނިސްޓްރީން ބުނެފި އެވެ.
މި މަޝްރޫއު ޕްލޭންކޮށްފައި އޮތް ގޮތުން މަސައްކަތް ނިންމަން ޖެހޭ ގޮތަށް އޮތީ އަންނަ އަހަރުގެ މެއި މަހުގެ 4 އަށެވެ.
ނަމަވެސް ހިތަދޫ އިސްލާމީ މަރުކަޒުގެ މަސައްކަތް އެކަށީގެންވާ ސްޕީޑްގައި ކުރިއަށް ނުދާތީ މަސައްކަތް އަވަސް ކުރުމާ ގުޅޭ ކޮންޓްރެކްޓަރާ މަޝްވަރާ ވެސް ކުރަމުން އަންނަ ކަމަށް މިނިސްޓްރީން ބުންޏެވެ.
މި މަޝްރޫއުގެ ކޮންޓްރެކްޓަރަކި ފެޑޯ ޕްރައިވެޓް ލިމިޓެވެ. ހިތަދޫ އިސްލާމީ މަރުކަޒުގެ ބިންގާ އެޅީ ޖުލައި، 26، 2023 ގަ އެވެ. ފެޑޯއާ މަޝްރޫއު ހަވާލުކުރީ މަސައްކަތް ފަށާތާ 540 ދުވަހުގެ ތެރޭގައި ނިންމާ ގޮތަށެވެ. އެ ކުންފުންޏާ މަޝްރޫއު ހަވާލުކުރީ މިދިޔަ އަހަރުގެ މާޗް 24 ގަ އެވެ. މަޝްރޫއުުގެ އަގަކީ 1.3 މިލިއަން ރުފިޔާ އެވެ.
މި އިސްލާމީ މަރުކަޒު ބިނާކުރަނީ ބޭންކް އޮފް މޯލްޑިވްސް (ބީއެމްއެލް) ގެ ހިތަދޫ ބްރާންޗް ކައިރީގައި ކުރިން ހިންގި އައްޑޫ ޕޮލިސް ޓްރެއިނިން ސްކޫލް ހުރި ބިމުގަ އެވެ.
ދެ ބުރި އަށް އިމާރާތް އައްޑޫ އިސްލާމީ މަރުކަޒަކީ 1،500 މީހުންގެ ޖާގައިގެ ނަމާދުކުރާ ބަޔަކާއި 450 މީހުންގެ ޖާގައިގެ މަލްޓި ޕާޕަސް ހޯލަކާއި ހަތަރު ކްލާސްރޫމާއި ދެ ސެމިނަ ރޫމްގެ އިތުރުން އިދާރީ އޮފީހާއި އިސްލާމިކް ލައިބްރަރީއަކާއި ޕޭންޓްރީއެއް ވެސް ހިމެނޭނެ ތަނެކެވެ.