ބޮލީވުޑްގެ ފިލްމީ ތަރި، ޝާހްރުކް ޚާން ލޮލުގެ ފަރުވާއަކަށް އެމެރިކާ އަށް މިއަދު ފުރަން ހަމަޖެހިފައިވާ ކަމަށް ރިޕޯޓްތައް ބުނެފި އެވެ.
މީޑިއާތަކުން ބުނީ 58 އަހަރުގެ އެކްޓަރުގެ ލޮލަށް ދިމާވެފައިވާ މައްސަލައަކަށް ފަރުވާ ހޯދަން އިއްޔެ މުމްބާއީގެ ހޮސްޕިޓަލަކަށް ވެސް އެޕޮއިންޓްމަންޓެއް ހަދައިގެން ދިޔަ ކަމަށެވެ. ނަމަވެސް ޕްލޭންކުރި ގޮތަށް އެކަން ކުރިއަށް ގޮސްފައި ނުވާތީ ޝާހްރުކް މިއަދު އެމެރިކާ އަށް ފުރަން ހަމަޖެހިފައިވާ ކަމަށް މީޑިއާތަކުން ބުންޏެވެ.
ނަމަވެސް އޭނަގެ ލޮލަށް ދިމާވެގެން އުޅެނީ ކޮން ކަހަލަ މައްސަލައެއް ކަމެއް ނޭނގެ އެވެ. ބައެއް މީޑިއާތަކުން ބުނީ މިކަމާ ގުޅޭ ގޮތުން ޝާހްރުކް މެނޭޖަރުގެ ޕޫޖާ ދަދްލާނީގެ ބަހެއް ހޯދަން ގުޅުމުންނާއި މެސެޖް ކުރުމުން އެއްވެސް އިޖާބައެއް މިހާތަނަށް ލިބިފައި ނުވާ ކަމަށެވެ.
ޝާހްރުކް ފަރުވާއަކަށް އެމެރިކާ އަށް މި ދަނީ އާ ފިލްމު "ދަ ކިންގް" ގެ ޝޫޓިން ވެސް ފަށަން ތައްޔާރުވަމުން އަންނަ ދަނޑިވަޅެއްގަ އެވެ. ސުޖޯއި ގޯޝް ޑައިރެކްޓްކުރަން ހަމަޖެހިފައިވާ މި އެކްޝަން ތުރިލާގައި ޝާހްރުކްގެ ދަރިފުޅު ސުހާނާ ޚާން ވެސް ހިމެނެ އެވެ.
މިދިޔަ އަހަރުގެ ޝާހްރުުގެ 3 ފިލްމެއް ރިލީޒްވި އެވެ. އެއީ "ޕަތާން" އާއި "ޖަވާން" އަދި "ޑަންކީ" އެވެ.