ލޯކަލް ކައުންސިލްތަކުގެ ކޯރަމް ހަމަވާނަމަ ބައިއިލެކްޝަންތައް ނުބޭއްވުމަށް މަޖިލީހުގެ މެޖޯރިޓީ ލީޑަރު އިންގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެއެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ސަރުކާރުގެ ފަރާތުން އިސްދޫ ދާއިރާގެ މެންބަރު އިސްމާއިލް ޝަފީއު ހުހުށަހަޅާފައިވާ އިސްލާހުގެ ބަހުސް ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ ކުރިއަށް ގެންގޮސްފައެވެ.
މި އިސްލާހަށް ވާހަކަ ދައްކަވަމުން މެންބަރު ފަލާހު ވިދާޅުވީ ރަށެއްގައި މިހާރު ފަސް ކައުންސިލަރުން ތިބޭއިރު އެއް ކައުންސިލަރެއް އިސްތިއުފާދީގެން ބައިއިލެކްޝަނެއް ބޭއްވުމުގެ ބަދަލުގައި ކައުންސިލްގެ ކޯރަމް ހަމަވާނަމަ އިންތިހާބު ނުބޭއްވުމަށް ތާއީދުކުރާ ކަމަށެވެ.
"އެ އިންތިހާބު ނުބާއްވަން އަޅުގަނޑު ތާއީދުކުރަނީ، ކޯރަމް ހަމަވާކަމަށްވަންޏާ. ފަސް ކައުންސިލަރުން ތިއްބަވާއިރު ތިން ކައުންސިލަރުން ތިއްބަވާނަމަ ކޯރަމް ހަމަވާނެ. ޖަލްސާތައް ބޭއްވޭ އަދަދު އެއޮތީ ހަމަވެފައި." ފަލާހު ވިދާޅުވިއެވެ.
މީގެކުރިން ކައުންސިލްތަކުގެ އަދަދު ތިން ކައުންސިލަރުންނަށް މަދުކުރުމުން އެމްޑީޕީގެ ވެރިކަމުގައި އެ އަދަދު އަނެއްކާވެސް ފަސް ކައުންސިލަރުންނަށް އިތުރު ކުރިކަން ފަލާހު ފާހަގަ ކުރެއްވިއެވެ. މެންބަރު ފަލާހު ވިދާޅުވީ ހުރިހާ ކަމެއްގައި އެއް ހައްލެއް ލިބޭނީ އެމްޑީޕީއަށް ވެރިކަން ނުދިނުމުން ކަމަށެވެ.
ލާމަރުކަޒީ ގާނޫނަށް ސަރުކާރުން އިސްލާހު ހުށަހެޅި ސަބަބުގެ ގޮތުގައި ބުނެފައިވަނީ، ކައުންސިލްތަކުގެ އުމުރުގެ ތެރޭގައި މެންބަރުންގެ ގޮނޑި ހުސްވާ ހާލަތްތައް އިތުރުވަމުންދިއުމުގެ ސަބަބުން ތަކުރާރުކޮށް ގިނަ އަދަދަކަށް ބައިއިލެކްޝަންތައް ބާއްވަންޖެހިފައިވާ ކަމަށެވެ. އޭގެ ސަބަބުން ބައިއިލެކްޝަންތަކަށް ކުރަންޖެހޭ ހަރަދުތައް އިތުރުވަމުންދާ ކަމަށާއި އެހެންކަމުން ބައިއިލެކްޝަންތައް ގިނަގިނައިން ބާއްވަންނުޖެހޭ ގޮތަށް ހަމަޖައްސައި، ބައިއިލެކްޝަންތައް ދެން ބާއްވާނީ، ކައުންސިލެއްގެ ގޮނޑި ހުސްވިކަން އަންގާތާ ގިނަވެގެން 183 ދުވަހުގެ މުއްދަތެއްގެ ތެރޭގައި ކަމަށް އިސްލާހު ހުށަހެޅި ސަބަބުގައި ބުނެފައިވެއެވެ. އެހެންނަމަވެސް ކައުންސިލްގެ ޤާނޫނީ އަދަދު ހަމަވާ މިންވަރަށް މެންބަރުން ނެތް ހާލަތެއްގައި 60 ދުވަހުގެ ތެރޭގައި ބައިއިލެކްޝަން ބައްވަންޖެހޭކަމަށްވެސް އިސްލާހުގައިވެއެވެ.