އިލެކްޝަންސް ކޮމިޝަނުގެ ރައީސް ފުއާދު ތައުފީޤުގެ ބަޔޯގްރަފީ ފޮތް "ގޮތުގައި"، ރައީސް ޑރ. މުހައްމަދު މުއިއްޒުއަށް ހަދިޔާ ކުރައްވައިފިއެވެ.
މި ފޮތް ރައީސް ހަދިޔާ ކުރައްވާފައިވަނީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި ބައްދަލުކުރެއްވުމުގައި ކަމަށް ރައީސް އޮފީހުން މައުލޫމާތުދެއެވެ. މި ބައްދަލުކުރެއްވުމުގައި ރައީސް މުއިއްޒު ވަނީ މި ފޮތް އިފުތިތާހު ކޮށްދެއްވާފައެވެ.
ލިޔުންތެރިޔާ އަހުމަދު ސާއިލް އަލީ ލިޔުއްވާފައިވާ 190 ސަފުހާގެ މި ފޮތުގައި، ފުއާދު ތައުފީޤުގެ ޒާތީ ހަޔާތާއި، މަސައްކަތުގެ ހަޔާތުގެ ހުރިހާ ވާހަކަތަކެއް ތަފުސީލާއެކު ހިމެނެއެވެ.
އެގޮތުން ރާއްޖެއަށް އަލަށް ކޮމްޕިއުޓަރު ގެނެސްގެން، އޭގެ ބޭނުންކޮށްގެން ފުއާދު އިސްވެ ހުންނަވައި ބޯހިމެނުމުގެ މަސައްކަތް ކުރިއަށް ގެންދެވި ދުވަސްވަރުން ފެށިގެން ސާކް ޖަމުއިއްޔާގެ ސެކްރެޓޭރިއޭޓުގައި ވަޒީފާ އަދާކުރެއްވި ދުވަސްވަރުގެ ވާހަކަތައް ހިމެނެއެވެ. މީގެ އިތުރުން އިލެކްޝަންސް ކޮމިޝަނުގައި ފުއާދު ކުރެއްވި މަސައްކަތްތަކާއި، ތަޖުރިބާތައްވެސް ހިމަނާފައިވެއެވެ.