ޕްލާސްޓިކް ބޭނުން ކުރާ މިންވަރު މަދުކުރުމުގެ ގޮތުން ބާޒާރުހައި ވިއްކަން ހުންނަ ޑިސްޕޯސަބަލް ނެޕީގެ ބަދަލުގައި ފޮތި ނެޕީ ބޭނުންކުރުމަށް ބާރުއެޅުމުހެ ގޮތުން "ބުޑު ފޮތި" ގެ ނަމުގައި ނ. މަގޫދޫގައި ޕްރޮގްރާމެއް ފަށައިފި އެވެ.
މިއީ އެ ރަށު އަންހެނުންގެ ތަރައްގީ އަށް މަސައްކަތްކުރާ ކޮމިޓީ އާއި، ރަށު ކައުންސިލާއި، ސިއްޙީ މަރުކަޒުގެ އިސްނެގުމާއެކު، ސޮނެވާ ނަމޫނާގެ އެހީތެރިކަމާއެކު ފެށި ޕްރޮގްރާމެކެވެ. މީގެ މައިގަނޑު މަގުސަދަކީ ރަށުގައި އުފެދޭ ނެޕީ ކުނި މަދުކޮށް، ރަށަށް އެތެރެ ކުރެވޭ ޑިސްޕޯބަސަލް ނެޕީ މަދުކޮށް، މުޖުތަމަޢުގައި ރީޔުސަބަލް ނެޕީ ބޭނުންކުރުމުގެ ސަޤާފަތެއް އާލާކުރުމެވެ.
ތިން މަސް ދުވަހަށް ކުރިއަށް ގެންދާ މި ޕްރޮގްރާމުގައި ރަށުގައި މި ވަގުތު ތިބި ނެޕީ ޖަހާ ހުރިހާ ކުދިންނާއި އެ ކުދިންގެ އާއިލާތައް ހިމެނޭ ގޮތައް ޖުމްލަ 32 އާއިލާއިން ޕްރޮގްރާމުގައި ބައިވެރިވެ އެވެ.
އެގޮތުން ޕުރޮގްރާމް ބޭއްވި އިވެންޓްގައި ކޮންމެ އާއިލާއަކަށް ވެސް ރީޔުސަބަލް ނެޕީ ކިޓެއް ހަވާލުކޮށް އެކިޓް ބޭނުންކުރާނެ ގޮތުގެ މަޢުލާމޫތު ފޯރުކޮށްދީފައިވެ އެވެ. މީގެ އިތުރުން ދަރިންނަށް ރައްކާތެރި ސިއްޙީ ވެއްޓެއް ކަށަވަރުކުރުމަށް މަސައްކަތްކޮށް އެކަމަށް ބާރުއަޅާ އާދަތައް އިސްކުރުމަށް އެއްބަސްވެ ޕްލެޖެއްގައި ޕްރޮގްރާމްގެ ބައިވެރިން ސޮއި ވެސް ކޮށްފައިވެ އެވެ.
ބުޑު ފޮތި ޕްރޮގުރާމު ފެށީ އެއްފަހަރު ބޭނުންކޮށްފައި އެއްލާލާ ނެޕީ ބޭނުންކުރާ ގޮތާ ގުޅޭ ގޮތުން މަގޫދޫގައި ސާވޭއެއް ކުރިއަށް ގެންދިޔުމަށް ފަހު އެވެ. އެ ސާވޭއިން ދައްކާ ގޮތުން މަހެއްގެ މައްޗަށް އެއްފަހަރު ބޭނުން ކޮށްފައި އުކާލާ ނެޕީ ގަތުމަށް ތުއްތު ކުއްޖަކު ބަލާ އާއިލާއަކުން މަހަކު 831ރ. ހަރަދު ކުރެ އެވެ. އެއީ ތިން އަހަރު ދުވަހަށް ބަލާނަމަ 30،000ރ. އެވެ.