ވަޒިފާއާ ބެހޭ ގާނޫނުގެ ދަށުން ރިސޯޓު މުވައްޒަފުންނަށް ހަފްތާއެކު ދެ އޮފް ދުވަސް ދިނުމަށް އެ ގާނޫނަށް ކެންދޫ ދާއިރާގެ މެންބަރު މައުރޫފް ޒާކިރު އިސްލާހެއް ހުށަހަޅުއްވައިފި އެވެ.
ސަރުކާރުގެ ފަރާތުން ވަޒިފާއާ ބެހޭ ގާނޫނަށް އިސްލާހު ގެނައުމަށް ހުށަހަޅާފައިވާ ބިލަށް ބަހުސް ކުރައްވަމުން މައުރޫފް ވިދާޅުވީ ރިސޯޓު މުވައްޒަފުން އާއިލާއާ ދުރުގައި ގިނަ ދުވަސްތަކެއް ހޭދަކުރާ ކަމަށާއި އެ މުވައްޒަފުންނަށް ހަފްތާއަކު ދެ އޮފް ދުވަސް ދިނުމަށް ގާނޫނަށް އިސްލާހު ހުށަހަޅާ ކަމަށެވެ.
"އަޅުގަނޑު ހުށަހަޅާލަން ބޭނުންވޭ ވަޒީފާއާ ބެހޭ ގާނޫނަށް, ހަފުތާއެކު ދެ ދުވަސް, ހާއްސަކޮށް ޓޫރިސްޓު ރިސޯޓުތަކުގައި ވަޒީފާ އަދާކުރާ މުވައްޒަފުންނަށް އޮފް ދުވަހުގެ ގޮތުގައި ކަނޑައެޅުމަށް،" މައުރޫފް ވިދާޅުވި އެވެ.
މިހާރު ވަޒީފާއާ ބެހޭ ގާނޫނުގައި އޮންނަ ގޮތުން އޮފް ދުވަސް އެއްކުރުމުގެ އިހުތިޔާރު އޮންނަނީ ވަޒީފާ ދޭ ފަރާތްތަކަށް ދޫކޮށްލާފައި ކަމަށާއި ނަމަވެސް އެ އުސޫލު ބަދަލުކުރަންޖެހޭ ކަމަށް މައުރޫފް ވިދާޅުވި އެވެ.
މިފަދަ އިސްލާހެއް ހުށަހަޅާފައިވާއިރު. ރިސޯޓު މުވައްޒަފުންނަށް މިހާރަށް ވުރެ ގިނައިން އާއިލާ ކައިރިއަށް ދެވޭނެ ގޮތް ހަދައިދެއްވާނެ ކަމަށް ރިޔާސީ އިންތިހާބުގެ ކެމްޕޭނުގެ ތެރޭގައި ރައީސް ޑރ. މުހައްމަދު މުއިއްޒު ވަނީ ވިދާޅުވެފަ އެވެ.