އިންޑިއާގެ އެކްޓަރު ސޯނޫ ސޫދު އަލަށް ޑަައިރެކްޓްކުރި ފިލްމު "ފަތޭ" އަންނަ އަހަރު ގެނެސްދޭން ނިންމައިފި އެވެ.
ފިލްމުގެ ޕޯސްޓަރުތަކެއް މިއަދު ދައްކާލައި ބުނީ ބެލުންތެރިންނަށް ފިލްމު ގެނެސްދޭނީ އަންނަ އަހަރުގެ ޖެނުއަރީ 10 ގައި ކަމަށެވެ. އެކްޝަން ތުރިލާއެއްގެ ގޮތުގައި ގެނެސްދޭ "ފަތޭ" ގެ ޝޫޓިން މިދިޔަ އަހަރު ނިންމާލައި، ފިލްމު މިހާރު އޮތީ ޕޯސްޓް-ޕްރޮޑަކްޝަން މަރުހަލާގަ އެވެ.
ސޯނޫ، 51، އާ އެކީ ޖެކްލީން ފެނާންޑޭޒް ބަތަލާގެ ރޯލުން ފެންނާނެ މި ފިލްމު އިއުލާންކުރީ 2021 ގަ އެވެ.
"ފަތޭ" އަންނަ އަހަރު ގެނެސްދޭން ނިންމި އިރު، މީގެ ޓީޒާއެއް މި އަހަރުގެ ކުރީކޮޅު އާންމުކޮށްފައިވެ އެވެ. މި ފިލްމަކީ ގިނަ ދުވަސްތަކެއް ފަހުން ސޯނޫ ފިލްމެއްގެ ލީޑުން ފެންނާނެ ފުރަތަމަ ފަހަރެވެ. ކެރިއަރުގެ ކުރީކޮޅު ލީޑް ރޯލު ފެނުނު ނަމަވެސް މި ފަހުން އޭނަ މުޅިން ވެސް ކުޅެފައި ވަނީ ސަޕޯޓިން ރޯލުތަކެވެ.
ބޮލީވުޑްގެ އިތުރުން ސޯނޫ އަކީ އިންޑިއާގެ ދެކުނުގެ ފިލްމުތައް ވެސް ކުޅޭ އެކްޓަރެކެވެ. އޭނަ އެންމެ ފަހުން ފެނިފައި ވަނީ މިދިޔަ އަހަރު ރިލީޒްކުރި ތަމަޅަ އެކްޝަން ތުރިލާ "ތަމިލަސަރަން" އިންނެވެ. ސޯނޫގެ އެންމެ ފަހުގެ ހިންދީ ފިލްމަކީ އަކްޝޭ ކުމާރުގެ 2022 ގެ ތާރީހީ ހަނގުރާމަ ފިލްމު "ސަމްރާޓް ޕްރިތުވީރާޖް" އެވެެ.