ދައުލަތް ވަރުގަދަ އަށް ހިނގާނަމަ ސިޔާސީ މަގާމުތައް އަދިވެސް އިތުރުކުރަންޖެހޭ ކަމަށް އޭދަފުށީ ދާއިރާގެ މެންބަރު އަހުމަދު ސަލީމް ވިދާޅުވެއްޖެ އެވެ.
ޕީއެންސީގެ ޖަގަހަ ޖަލްސާގައި މިރޭ ވާހަކަދައްކަމުން ސަލީމް ވިދާޅުވީ ސިޔާސީ މަގާމުތައް މާގިނަ ކަމަށް ބުނެ ބައެއް ފަރާތްތަކުން ވާހަކަދައްކަމުންދާ ކަމަށާއި ނަމަވެސް ދައުލަތް ވަރުގަދަ އަށް ހިނގާނަމަ ސިޔާސީ މަގާމުތައް އަދިވެސް އިތުރުކުރަންޖެހޭ ކަމަށެވެ.
"ސިޔާސީ މަގާމެއް ދޭ ކޮންމެ ރައްޔިތަކީ ވެސް އަޅުގަނޑުމެން ގަބޫލުކުރަންޖެހޭނެ، މިއީ ބަންގްލަދޭޝް މީހެއް ނުވަތަ އިންޑިއާ ނޫނީ އެހެން ރަށެއްގެ މީހެއް ވެސް ނޫން، މިއީ ދިވެހި ރައްޔިތުން. މީގެއިން ކޮންމެ މީހެއްގެ ވެސް އާއިލާއެއް އޮންނާނެ. އެމީހުން ވެސް ދިރިއުޅުމަށްޓަކާ މަގާމުތައް ބޭނުންވާނެ، ފައިސާ ބޭނުންވާނެ،" ސަލީމް ވިދާޅުވި އެވެ.
ސަލީމް ވިދާޅުވީ އެންމެ ނިކަމެތި މީހާ ވެސް ރަނގަޅަށް ދިރިއުޅެން ބޭނުންވާނެ ކަމަށާއި ސަރުކާރުގެ މަގުސަދަކީ ކުންފުނިތަކުގައި ވަޒީފާތައް އުފައްދައިގެން ނަމަވެސް މި ފަސް އަހަރު ނިމޭއިރު ވަޒީފާ ބޭނުންވާ ހުރިހާ އެންމެންނަށް ވަޒީފާ ލިބޭނެ މަގުފަހިކޮށްދިނުން ކަމަށެވެ. ރައްޔިތުން ކަންބޮޑުވާންޖެހޭ ކަމެއް ނެތް ކަމަށާއި ސަރުކާރު ބަނގުރޫޓުވާ ކަމަށް ބުނެ ދައްކަމުންދަނީ ހަގީގަތެއް ހުރި ވާހަކަތަކެއް ނޫން ކަމަށްވެސް ސަލީމް ވިދާޅުވި އެވެ.
ސަލީމް ވަނީ ފާއިތުވި 8 މަސް ދުވަހުގެ ތެރޭގައި މީގެކުރިން މުސާރަ ދޭ ދުވަހަށް ވުރެ އެއް ދުވަސްކުރިން މުވައްޒަފުންނަށް މުސާރަ ދެމުންދާ ކަމަށްވެސް ވިދާޅުވެފަ އެވެ.