ރައީސް ޑރ. މުހައްމަދު މުއިއްޒުގެ ވަރުގެ "ކޫލް" ރައީސަކު މިހާތަނަށް ދެކެފައި ނުވާ ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.
ޕީއެންސީގެ ހަރުގެ ޖަލްސާގައި މިރޭ ވާހަކަދައްކަމުން އާދަމް ޝަރީފް ވިދާޅުވީ އެކި ވެރިންނާއި އެކީ އެކި ތަޖުރިބާތައް ކުރެވިފައިވާ ކަމަށާއި ނަމަވެސް ރައީސް މުއިއްޒު ވަރުގެ ސާދާ، ސީދާ ވެރިއެއް ދެކެފައި ނުވާ ކަމަށެވެ.
"ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަރުގެ ސާދާ ސީދާ އަދި އެހާ ކޫލު ޕްރެސިޑެންޓެއް އަދި އަޅުގަނޑުމެން ނުދެކެން،" އާދަމް ޝަރީފް ވިދާޅުވި އެވެ.
އާދަމް ޝަރީފް ވިދާޅުވީ ރައީސް މުއިއްޒު ކަންކަން ނިންމަވަނީ އެންމެންގެ ވެސް މަޝްވަރާއާއެކު ކަމަށާއި ރާއްޖޭގައި ސުލްހަ މަސްލަސްކަން ހަމަޖެހިފައި މިއޮތީ ރައީސްގެ ޒައާމަތް ވަރުގަދަވުމުން ކަމަށެވެ. ރައީސް މުއިއްޒާއެކު މަސައްކަތް ކުރަން ވަރަށް ފަސޭހަ ކަމަށާއި ޕީއެންސީގައި މިހާރު އޮތީ އެންމެ މައްސަލައެއް ކަމަށްވާއިރު އެއީ ރައީސް މުއިއްޒުގެ ޒައާމަތުގައި އެމަނިކުފާނާ އެކު މަސައްކަތް ކުރަން ބޭނުންވެގެން ތިބި އެންމެނަށް އެ ފުރުސަތު ނެތުން ކަމަށް ވިދާޅުވި އެވެ.
ރައީސް މުއިއްޒަށް ވަރަށް ބޮޑަށް ތައުރީފު ކުރައްވަމުން އާދަމް ޝަރީފް ވަނީ ރައްޔިތުން މިއަދު ތިބީ ރައީސް މުއިއްޒުގެ ފަހަތްޕުޅުގައި ކަމަށާއި ބައި އިލެކްޝަންތަކުގެ ނަތީޖާ އިން ބުނެދެނީ ސިޔާސީ މުސްތަގުބަލެއް ވެސް ހަމައެކަނި އޮތީ ޕީއެންސީގައި ކަމަށްވެސް ވިދާޅުވެފަ އެވެ. އަދި ކުރިއަށް އޮތް ތަނުގައި ރާއްޖޭގެ އެންމެ ބޮޑު ޕާޓީ އަކަށް ޕީއެންސީ ވެގެންދާނެ ކަމަށްވެސް އާދަމް ޝަރީފް ވިދާޅުވި އެވެ.