މި ފަސް އަހަރު ނިިމޭއިރު އެންމެން ތިބޭނީ ވަޒީފާގައި ކަމަށް އޭދަފުށީ ދާއިރާގެ ޕީއެންސީ މެންބަރު އަހުމަދު ސަލީމް (ރެޑްވޭވް ސަލީމް) ވިދާޅުވެއްޖެ އެވެ.
ޕީއެންސީގެ ހަރުގެ ޖަލްސާގައި ރޭ ވާހަކަދައްކަމުން ސަލީމް ވިދާޅުވީ މި ސަރުކާރުގެ މަގުސަދަކީ ކުންފުނިތަކުގައި އިތުރު ވަޒީފާތައް އުފައްދައިގެން ނުވަތަ ވަޒީފާ އުފެދޭނެ އިތުރު ވަސީލަތްތައް ގާއިމުކުރުން ކަމަށެވެ.
"އިރާދަކުރެއްވިއްޔާ މި ފަސް އަހަރު ތެރޭ ވަޒީފާ ބޭނުންވާ މީހަކަަށް ވަޒީފާ ނުލިބި ނުހުންނާނެ. ހުރިހާ މީހުން ތިބޭނީ ވަޒީފާގައި. އަދި އެ މީހުން ތިބޭނީ ވެސް އެކަށީގެންވާ މުސާރައިގައި. އެއްގޮތަކަށް ވެސް ރައްޔިތުން ކަންބޮޑުވާކަށް ނުޖެހޭ،" ސަލީމް ވިދާޅުވި އެވެ.
ސަލީމް ވިދާޅުވީ ސަރުކާރު ބަނގުރޫޓުވާ ކަމަށް ބުނެ ދައްކަމުންދަނީ ހަގީގަތެއް ހުރި ވާހަކަތަކެއް ނޫން ކަމަށާއި އެގޮތުން ފާއިތުވި 8 މަސް ދުވަހުގެ ތެރޭގައި މީގެކުރިން މުސާރަ ދޭ ދުވަހަށް ވުރެ އެއް ދުވަސްކުރިން މުވައްޒަފުންނަށް މުސާރަ ދެމުންދާ ކަމަށެވެ. މި ސަރުކާރު ވެރިކަމާ ހަވާލުވިފަހުން ރައްޔިތަކަށް އުނިވި އެއްޗެއް ނެތް ކަމަށާއި ސިވިލް ސާވިސްއިން ވެސް އަދި ސަރުކާރު ކުންފުންޏަކުން އެއްވެސް މީހަކު ކަނޑާލާފައި ނުވާނެ ކަމަށްވެސް ސަލީމް ވިދާޅުވި އެވެ.
މީގެއިތުރުން ރައީސް މުއިއްޒު ގެންދަވަނީ މި ގައުމުގައި އިސްލާހުގެ ޕްރޮގްރާމެއް ކަމަށާއި އެގޮތުން ހައްގުވެރި ފަރާތަކަށް ލިބެންޖެހޭ އެއްވެސް އެއްޗެއް ނުލިބި ނުދާނެ ކަމަށްވެސް ސަލީމް ވިދާޅުވި އެވެ.