ލޯކަލް ކައުންސިލްތަކުގެ އިންތިޚާބުގެ ޤާނޫނަށް ހުށަހަޅާފައިވާ އިސްލާހުގެ ބަހުސް ފަށައިފިއެވެ.
ލޯކަލް ކައުންސިލްތަކުގެ އިންތިޚާބުގެ ޤާނޫނަށް ސަރުކާރުގެ ފަރާތުން އިސްލާހު ހުށަހެޅުއްވީ ކާށިދޫ ދާއިރާގެ މެންބަރު މުންތަޡިމް އިބްރާހީމްއެވެ.
މި އިސްލާހު މަޖިލީހަށް ހުށަހަޅުއްވާ ވާހަކަ ދައްކަވަމުން މެންބަރު މުންތަޡިމް ވިދާޅުވީ، ރާއްޖޭގައި ލާމަރުކަޒީ ނިޒާމަށް އަމަލުކުރާތާ 15 އަހަރު ވެފައިވާ ކަމަށާއި މި މުއްދަތުގައި މި ނިޒާމުގައި ހުރި ރަނގަޅު ކަންކަން އަދި އުނި ކަންކަންވެސް ފާހަގަ ކުރެވިފައިވާ ކަމަަށެވެ.
މުންތަޡިމް ވިދާޅުވީ އިންތިހާބުތަކަށް ކުރަންޖެހޭ ހަރަދު ބޮޑޫ ކަމަށާއި މިނިވަން އިންތިހާބެއް ބޭއްވުމަށް ކުރާ މަސައްކަތުގައި ހަރަދުތައް ބޮޑު ކަމަށެވެ. އެގޮތުން މުވައްޒަފުން ތަމުރީނު ކުރުމާއި ދަތުރުތަކަށް ބޮޑު ހަރަދު ހިންގާ ކަމަށެވެ. ކޮންމެ 6 މަަހކުން ބައިއިލެކްޝަން ބާއްވާނަމަ ހަރަދުތައް ވަރަށް ބޮޑުވާ ކަމަށާއި، މި އިސްލާހުގައި ބައިއިލެކްޝަން އަހަރަކު 2 ފަހަރު ބާއްވާގޮތަށް ހަމަޖެއްސުމަކީ ހަރަދުތައް ވަރަށް ބޮޑަށް ކުޑަވާނެ ކަމެއް ކަމަށެވެ.
ލޯކަލް ކައުންސިލްތަކުގެ އިންތިހާބުގެ ޤާނޫނަށް ގެންނަ މައިގަނޑު އިސްލާހުތަކުގެ ތެރޭގައި، ލޯކަލް ކައުންސިލްތަކުގެ ހުސްވާ ގޮނޑިއަށް މެންބަރުން އިންތިހާބުކުރަން ބާއްވާ ބައިއިލެކްޝަންތައް ބާއްވަންވާނީ އަހަރަކު ދެފަހަރު ކަމުގައެވެ. އަދި އެފަދައިން އަހަރަކު ދެފަހަރު ބައިއިލެކްޝަން ބާއްވާއިރު، ދެ ބައިއިލެކްޝަންގެ ދެމެދުގައި 183 ދުވަހަށްވުރެ ދިގު އަދި 120 ދުވަހަށްވުރެ ކުރު މުއްދަތެއް ފާއިތުވެގެންނުވާނެ ކަމުގައި ކަނޑައެޅުމަށްވެސް ހިމަނާފައިވެއެވެ.