ރާއްޖޭގެ މިހާރުގެ އިގުތިސާދީ ހާލަތަށް ރިއާޔަތްކޮށް، ސަރުކާރުން އަޅާ ޚަރަދު ކުޑަކުރުމުގެ ފިޔަވަޅުތަކުން ރައްޔިތުންގެ ދިރިއުޅުމުގެ ފެންވަރަށް އެއްވެސް އުނިކަމެއް ނާންނާނެ ކަމަށް ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް ވިދާޅުވެއްޖެ އެވެ.
ވެރިކަން ކުރާ ޕީއެންސީން ރާ ބޭއްވި ހަރުގެ ޖަލްސާގައި ދިއްގަރު ދާއިރާގެ މެންބަރު ވިދާޅުވީ ގައުމުގެ މިނިވަންކަން ވެސް ދެމެހެއްޓޭނީ އިގުތިސާދު ދަމަހައްޓައިގެން ކަމަށެވެ. އެހެންވެ އެކަން ކުރުމަށްޓަކައި އާމްދަނީ އިތުރުކޮށް، ޚަރަދުތައް ކުޑަކުރަން ޖެހޭ ކަމަށް ވިދާޅުވިއެވެ.
ނާޒިމު ވިދާޅުވީ ޚަރަދު ކުޑަކުރިޔަސް ރައްޔިތުންނަށް މިހާރު ލިބޭ ޚިދުމަތްތައް އެންމެ ފުރިހަމައަށް ލިބެމުން ދާނެ ކަމަށާއި އެ ޚިދުމަތްތައް އެންމެ ބޮޑަށް ބޭނުންޖެހިފައިވާ ފަރާތްތަކަށް އެއްވެސް އުނިކަމެއް ނެތި ލިބޭނެ ގޮތަކަށް ބަޖެޓްގެ ކަންކަން ވެސް ނިމޭނެ ކަމަށެވެ.
"ޚަރަދުތައް ކުޑަކުރުމަށް އަޅާ އެއްވެސް ފިޔަވަޅެއްގެ ސަބަބުން ރައްޔިތުންގެ ދިރިއުޅުމުގެ ފެންވަރަށް އެެއްވެސް ކަހަލަ އުނިކަމެއް ނާންނާނެކަމުގެ ފުރިހަމަ ޔަގީންކަން އަޅުގަނޑުމެންނަށް އެބައޮތް،" ނާޒިމު ވިދާޅުވި އެވެ. "ޚަރަދު ކުޑަކުރަން ފިޔަވަޅުތަކެއް އެޅިޔަސް ރައްޔިތުންގެ ތެރެއިން ބޭނުން ޖެހިފައިވާ މީހުންނަށް، އެއީ އާސަންދަ ވިޔަސް ހަމަ އެ ކަންކަން ފުރިހަމަ ވާނެ."
އޭނަ ވިދާޅުވީ ޚަރަދު ކުޑަކުރަން ޖެހޭ ވަރަށް މުހިއްމު ސަބަބުތަކެއް އެބަހުރި ކަމަށެވެ. އެގޮތުން ކުރީގެ ރައީސް އިބްރާހިމް މުޙައްމަދު ސޯލިހުގެ ވެރިކަން ނިމުނުއިރު އާސަންދައިން އެކަނި ވެސް އެކި ފަރާތްތަކަށް 1.1 ބިލިއަން ރުފިޔާ ނުދައްކާ ހުރި ކަމަށާއި އެކަން ހައްލުކުރުމަށް އާސަންދައިގެ ޚިދުމަތްދޭ ތަންތަނަށް މި ސަރުކާރުން ފާއިތުވި އަށް މަސް ދުވަހުގެ ތެރޭގައި ވެސް 1.4 މިލިއަން ރުފިޔާ ދައްކަން ޖެހުނު ކަމަށެވެ.
އަދި ޚަރަދު ކުޑަކުރުމުގެ ގޮތުން އަޅަން ޖެހޭ ފިޔަވަޅުތައް އަދިވެސް އަޅަން ޖެހެނީ ދަރަނީގެ މިދަދަ ބެކްލޮގްތަކާ ހެދި ކަމަށް ވިދާޅުވިއެވެ.
ނާޒިމް ވިދާޅުވީ، އަންނަ ނޮވެމްބަރުގައި މަޖިލީހަށް ބަޖެޓު ފާސްކުރުމަށް ހުށަހަޅާއިރު ރައްޔިތުންނަށް ބޭނުންވާ ހުރިހާ ކަމެއް ފުރިހަމަކަން ޔަގީންކުރާނެ ކަމަށެވެ.
އޭނާ ވިދާޅުވީ އެއްވެސް ވެރިކަމެއްގައި ކުރަން ނުކެރުނު އެތައް ކަމެއް ކުރަން މި ސަރުކާރުން ފައްޓާފައިވާ ކަމަށެވެ. އެގޮތުން މީގެ ކުރީ ސަރުކާރުތަކުން ހުށަނާޅާ އެތައް އިސްލާހެއް މިހާރުވެސް ރައީސް ޑރ. މުޙައްމަދު މުއިއްޒު މަޖިލީހަށް ހުށަހަޅުއްވާފައިވާ ކަމަށް ނާޒިމް ވިދާޅުވިއެވެ.
މަޖިލިހުން ކެނޑިނޭޅި މަސައްކަތްކުރަމުން ދަނީ އެ އިސްލާހުތައް ވީހާވެސް އަވަހަކަށް ގާނޫނަށް ގެނެސް، ރާއްޖޭގެ އިޖުތިމާއީ ކަންކަމަށް ހުރި ގޮންޖެހުންތަކާއި، ގޭންގު ކުށްތަކާއި، ބިދޭސީންގެ މައްސަލައާއި، އެ ނޫންވެސް ގިނަ ކަންކަން ހައްލުކުރުމަށް ކަމަށް ނާޒިމް ވިދާޅުވިއެވެ.