ރާއްޖެ އިން ޗައިނާއާ އެކީ ހަދާފައިވާ މިނިވަން ވިޔަފާރިގެ އެއްބަސްވުން (އެފްޓީއޭ) ގެ ސަބަބުން ރާއްޖެ އަށް ވާނެ ފައިސާ ނެތް ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
ރޭ އެމްޑީޕީން ބޭއްވި ޕެނަލް ޑިސްކަޝަނެއްގައި ކުރީގެ އިކޮނޮމިކް މިނިސްޓަރު ވިދާޅުވީ، އެފްޓީއޭގެ ފައިދާ ލިބޭނީ ރާއްޖޭގެ ބަދަލުގައި ޗައިނާ އަށް ކަމަށެވެ. އެހެންވެ މިއީ ރާއްޖެ އަށް ގެއްލުންވާނެ އެއްބަސްވުމެއް ކަަމަށް ފައްޔާޒު ވިދާޅުވި އެވެ.
އޭނާ ވިދާޅުވީ، ޗައިނާ އިން ރާއްޖެ އަށް އެތެރެކުރާ މުދަލުން ސުން ޕަސެންޓް ޑިއުޓީ ނަގާފައި، ދުބާއީ އާއި ސިންގަޕޫރު ފަދަ ގައުމުތަކުން ގެންނަ މުދަލުން ޑިއުޓީ ނަގާ ނަމަ އެ މުދާތައް ގެންނަން ޗައިނާ އަށް އެކަނި ބަރޯސާވާން ދިވެހި ވިޔަފާރިވެރިންނަށް މަޖުބޫރުވާނެ ކަަމަށެވެ. އޭގެ ސަބަބުން އެހެން ގައުމުތަކުން ގެންނަ މުދަލުގެ އަގު ބޮޑުވުމާއި ވާދަވެރި މާހައުލެއް ނެތުން ފަދަ ކަންކަން ދިމާވާނެ ކަމަށް ވިދާޅުވި އެވެ.
"އެހެންވީމާ މިވާ ގޮތަކީ މަޑުމަޑުން ގޮސް އަޅުގަނޑުމެން ޒަމާނުއްސުރެ އުފައްދާފައި ހުރި ޓްރޭޑް ލިންކުތައް ފުނޑުފުނޑުވެގެން ދަނީ." ފައްޔާޒު ވިދާޅުވި އެވެ.
އޭނަ ވިދާޅުވި ގޮތުގައި ރާއްޖެ އަކީ މުދާ އެކްސްޕޯޓް ކުރާ ގައުމަކަށް ނުވާތީ އެފްޓީއޭގެ ފައިދާ އޮތީ އެކްސްޕޯޓްކުރާ ގައުމުތަކަށެވެ.
"ޗައިނާ އަށް އަޅުގަނޑުމެން މަސް ބޭރު ކުރަންށޭ ކިޔާފައި އެފްޓީއޭއެއް ހަދާއިރުގައި ޗައިނާގެ އެތައް ހާސް މުދަލެއް ޑިއުޓީ ނުނަގައި ރާއްޖެ އަށް ވެއްދޭ ގޮތް ހެދީމާ ޑިއުޓީ ވެސް އަޅުގަނޑުމެންނަށް ގެއްލެނީ، އަޅުގަނޑު މި ދެންނެވި ޓްރޭޑް ލިންކުތައް ވެސް ހަލާކުވެގެން ދަނީ ޗައިނާ އަށް އަޅުގަނޑުމެންގެ މަސް ބޭރު ކުރެވިދާނެ ކަމުގެ އުންމީދުގައި،" ފައްޔާޒު ވިދާޅުވި އެވެ. "ޗައިނާ އަކީ އަޅުގަނޑުމެންގެ ބޮޑު ކޮމްޕެޓިޓާއެއް މަހުގެ ބާޒާރަށް ބަލައިފިއްޔާ."
ޗައިނާއާ އެކީ އެފްޓީއޭ ހެދުން އެމްޑީޕީން މައްސަލައެއްގެ ގޮތުގައު ފާހަގަކުރާ އިރު، އެމްޑީޕީ ސަރުކާރުން އިނގިރޭސިވިލާތާ އެކީ، އެފްޓީއޭއެއް ހަދަން އެމްއޯޔޫއެއްގައި ސޮއިކުރިކަން ފައްޔާޒް ފާހަގަކުރެއްވި އެވެ. އަދި އެއީ ރާއްޖެ އިން އެންމެ ގިނައިން މަސް ބޭރުކުރާ ގައުމަށްވާތީ އޭގެ ފައިދާ ކުރާނެ ކަމަށް އޭނާ ވިދާޅުވި އެވެ.
މިދިޔަ ހުކުރު ދުވަހުގެ ރޭ ބޭއްބި މިނިވަން ދުވަހުގެ ޖަލްސާގައި ރައީސް މުއިއްޒު ވިދާޅުވެފައިވާ ގޮތުގައި އިނގިރޭސިވިލާތާއި އިންޑިއާއާ އެކީ އެކީ މިނިވަން ވިޔަފާރިގެ މަޝްވަރާތައް ސަރުކާރުން އަންނަނީ ކުރަމުންނެވެ.
ރައީސް ވިދާޅުވެފައި ވަނީ ސެޕްޓެމްބަރު މަސް ނިމުމުގެ ކުރިން ޗައިނާގެ އެފްޓީއޭގެ އެއްބަސްވުން ތަންފީޒު ކުރަން ފަށާނެ ކަމަށެވެ. އޭގެ ސަބަބުން މަސްވެރިކަމުގެ 298 ބާވަތަކުން ޑިއުޓީ މާފު ވާނެ ކަމަށާއި އެޑެޑް އެކި ބާތްތަކުގެ ތެރެއިން 7،897 ބާވަތަކުން ޑިއުޓީ މާފު ވާނެ ކަމަށް ވެސް ވިދާޅުވި އެވެ.