މިދިޔަ އަހަރު ރިލީޒްކުރި ކާމިޔާބު ފިލްމު "ޓުވެލްތު ފެއިލް" އިން އެންމެ މޮޅު އެކްޓަރުގެ ނެޝަނަލް އެވޯޑް ލިބޭނެ ކަމަށް އުންމީދިކުރާ ކަމަށް އެކްޓަރު ވިކްރާންތި މަސީ ބުނެފި އެވެ.
އެ ފިލްމުގައި އޭނަ ދެއްކި މޮޅު އެކްޓިން އިން ނެޝަނަލް އެވޯޑް ހައްގުވާ ކަމަށް ވަރަށް ގިނަ ބަޔަކު އަންނަނީ ބުނަމުންނެވެ. އަދި ގިނަ ބަޔަކު އޭނަ އަށް ނެޝަނަލް އެވޯޑް ލިބެން އުންމީދު ކުރާތީ އަމިއްލަ އަށް ވެސް އެ އުންމީދު މިހާރު އޮތް ކަމަށް ހުނަރުވެރި އެކްޓަރު ބުންޏެވެ.
ޕިންކްވިލާ އަށް ވިކްރާންތު ބުނީ އޭނަ އަށް ނެޝަނަލް އެވޯޑް ހައްގުވާ ކަމަށް ވަރަށް ގިނަނ ބަޔަކު ބުނުމަކީ ވަރަށް އުފާ ވެސް ކުރާ ކަމެއް ކަމަށެވެ.
"އެހެންވެ ރިޔާސީ ގަނޑުވަރަށް ގޮސް ރައީސްގެ އަތްޕުޅުން އިނާމު ލިބިގަތުމަކީ އަހަރެން ވެސް މިހާރު ދެކޭ ހުވަފެނެއް،" ވިކްރާންތު ބުންޏެވެ. "އުންމީދު ކުރަން ޓްވެލްތު ފެއިލް އިން އެ ހުވަފެން ހަގީގަތަކަށް ހަދައި ދޭނެ ކަމަށް."
މިދިޔަ އަހަރުގެ އެންމެ ކާމިޔާބު ބޮލީވުޑްގެ ފިލްމުތަކުގެ ތެރޭގައި ހިމެނޭ "ޓުވެލްތު ފެއިލް" އަކީ ކުޅަދާނަ ޑައިރެކްޓަރު ވިދޫ ވިނޯދު ޗޯޕްޅާ ގެނެސްދިން ބައޮގްރަފިކަލް ޑްރާމާއެކެވެ. އޭގައި ވިކްރާންތު ކުޅުނީ ވަރަށް ނިކަމެތި ހާލުން އެކަމަކު ބުރަ މަސައްކަތުން ފުލުހަކަށްވި މަނޯޖް ކުމާރު ޝަރުމާގެ ރޯލެވެ.
ވިކްރާންތު، 37، ގެ ކުރިއަށް އޮތް ފިލްމަކީ އަންނަ މަހުގެ 9 ގައި ނެޓްފްލިކްސް އިން ޕްރީމިއާކުރަން ހަމަޖެހިފައިވާ ރޮމޭންޓިކް ތުރިލާ "ޕިރު އާއީ ހަސީން ދިލްރުބާ" އެވެ.