ހަރަދު ކުޑަކުރުމަށް ބައިއިލެކްޝަންތަކުގައި އީވޯޓިން ނިޒާމު ބޭނުންކުރުމަށް ކެންދޫ ދާއިރާގެ މެންބަރު މައުރޫފް ޒާކިރު ގޮވާލައްވައިފިއެވެ.
ރައްޔިތުންގެ މަޖިލީޙުގެ މިއަދުގެ ޖަލްސާގައި، ލޯކަލް ކައުންސިލްތަކުގެ އިންތިޚާބުގެ ޤާނޫނަށް ސަރުކާރުން ހުށަހަޅާފައިވާ އިސްލާހަށް ވާހަކަ ދައްކަވަމުން މެންބަރު މައުރޫފް ވިދާޅުވީ ހަރަދުކުޑަކުރުމަށް ކަމަށްބުނެ އިންތިހާބުތައް މަދުކުރުން ބަލައިނުގަނެވޭނެ ކަމަށެވެ. މައުރޫފް ވިދާޅުވީ ވޯޓުލާން ނުކުންނަ މީހުން މަދުކަމަށްބުނެ އިންތިހާބުތައް މަދުކުރިމަކި ޑިމޮކްރަސީގައި ފަހަތަށް އެޅޭނެ ފިޔަވަޅެއް ކަމަށެވެ.
އިންތިހާބު މަދުކުރުމުގެ ބަދަލުގައި ޒާމާނީ ޓެކްނޮލޮޖީ ބޭނުން ކުރުމަށް މައުރޫފް ގޮވާލެއްވިއެވެ.
އެގޮތުން ވާހަކަ ދައްކަވަމުން ވިދާޅުވީ، ބައިއިލެކްޝަންތައް ކުދި ކުދި އާބާދީތަކުގައި ބާއްވާއިރު އީވޯޓިން ނިޒާމު ބޭނުންކޮށް އެއަށް ރައްޔިތުން އަހުލުވެރިކުރެވޭނެ ކަމަށެވެ. އަދި އެއީ އީވޯޓިން ނިޒާމަކަށް ބަދަލުކުރުމަށް ރަނގަޅު ފެށުމަކަށްވާނެ ކަމަށްވެސް ވިދާޅުވިއެވެ.
ލޯކަލް ކައުންސިލްތަކުގެ އިންތިހާބުގެ ޤާނޫނަށް ގެންނަ މައިގަނޑު އިސްލާހުތަކުގެ ތެރޭގައި، ލޯކަލް ކައުންސިލްތަކުގެ ހުސްވާ ގޮނޑިއަށް މެންބަރުން އިންތިހާބުކުރަން ބާއްވާ ބައިއިލެކްޝަންތައް ބާއްވަންވާނީ އަހަރަކު ދެފަހަރު ކަމުގައެވެ. އަދި އެފަދައިން އަހަރަކު ދެފަހަރު ބައިއިލެކްޝަން ބާއްވާއިރު، ދެ ބައިއިލެކްޝަންގެ ދެމެދުގައި 183 ދުވަހަށްވުރެ ދިގު އަދި 120 ދުވަހަށްވުރެ ކުރު މުއްދަތެއް ފާއިތުވެގެންނުވާނެ ކަމުގައި ކަނޑައެޅުމަށްވެސް ހިމަނާފައިވެއެވެ.