ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ގެ ހުސްވެފައިވާ މެންބަރުކަމަށް އިސްމާއިލް ހަބީބް އައްޔަނު ކުރުމަށް ރައްޔިތުންގެ މަޖިލީހުން ފާސްކޮށްފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހަބީބަށް ރުހުންދޭން ފާސްކުރީ ވޯޓުގައި ބައިވެރިވި 74 މެންބަރުންގެ ވޯޓުންނެވެ. އަދި ނުފެންނަ ކަމަށް ތިން މެންބަރުން ވޯޓު ދެއްވިއެވެ.
އިއްޔެ ބޭއްވި މަޖިލީިހުގެ ހިއުމަން ރައިޓްސް އެންޑް ޖެންޑާ ކޮމިޓީގެ ބައްދަލުވުމުގައި އެކޮމިޓީގެ މުގައްރިރު މެންބަރު ފާތިމަތު ސައުދާ ވިދާޅުވީ، ހަބީބަށް އެވްރެޖް 75 ޕަސެންޓަށް ވުރެ އިތުރަށް މާކްސް ލިބިފައިވާ ކަމަށެވެ. އަދި އިއްޔެ އެ ކޮމިޓީން ވަނީ ހަބީބަށް ރުހުން ދޭން ފެންނަ ކަމަށް ފާސްކޮށްފައެވެ.
އެޗްއާރްސީއެމްގެ ހުސްވެފައިވާ މެންބަރުކަމަށް ހަބީބްގެ ނަން ރައީސް ޑރ. މުހައްމަދު މުއިއްޒު ފޮނުއްވާފައިވާއިރު ހަބީބަކީ އިލެކްޝަން ކޮމިޝަން (އީސީ) ގެ މެންބަރުކަން ދެ ދައުރަކަށް ކުރައްވާފައިވާ ފަރާތެކެވެ. މި އަހަރުގެ މާޗު މަހު ހަބީބުގެ ދެވަނަ ދައުރު އީސީގައި ހަމަވި އިރު، އޭނާ ވަނީ އީސީގައި 21 އަހަރު ހިދުމަތް ކުރައްވާފައެވެ.