އައްޑޫސިޓީ ހިތަދޫގައި ފުލުހުން ހިންގި އޮޕަރޭޝަނެއްގައި އަންހެނަކު ފެންވަރަން ހުއްޓާ ފާހާނާއެއްގެ ދޮރުވައްޓާލިކަމަށް ބުނެ ދެކެވޭ ވާހަކަ ފުލުހުން ދޮގުކޮށްފިއެވެ.
ފުލުހުން މިއަދު ބުނެފައިވަނީ މަސްތުވާތަކެތީގެ މައްސަލައެއްގައި ހިތަދޫގެ އެޕާޓްމެންޓެއް އިއްޔެގެ ވަގުތެއްގައި ކޯޓު އަމުރެއްގެ ދަށުން ބަލާފާސްކޮށްފައިވާ ކަމަށެވެ.
އެ އެޕާޓްމެންޓަށް ފުލުހުން ވަނުމަށް ދޮރު ހުޅުވުމަށް ތަކުރާރުކޮށް އެދުމުންވެސް ދޮރު ނުހުޅުވުމުން، އެޕާޓްމެންޓަށް ފުލުހުން ވަދެފައިވަނީ ތަޅު ހަލާކުކޮށްލައިގެން ކަމަށް ފުލުހުން ބުނެފައިވެއެވެ. އަދި އެޕާޓްމެންޓްގެ ދެ ކޮޓަރިއެއްގެ ދޮރު ހުޅުވުމަށް ތަކުރާރުކޮށް އެދުމުންވެސް ކޮޓަރީގެ ދޮރު ނުހުޅުވުމުން ތަޅު ހަލާކުކޮށްލައިގެން ކޮޓަރިއަށް ވަދެފައިވާ ކަމަށް ބުނެފައިވެއެވެ.
"އޭގެތެރެއިން އެއް ކޮޓަރީގައި ފެންވަރައިގެން ނުކުމެހުރި އަންހެނަކު ހުރުމުން ފުލުހުން ވަނީ ދޮރު ލެއްޕުމަށްފަހު، ކޮޓަރިން ނުކުތުމަށް ފުރުސަތު ދީފަ." ފުލުހުން މައުލޫމާތު ދީފައިވެއެވެ.
ފުލުހުން ބުނެފައިވަނީ އެޕާޓްމެންޓްގެ އެއްވެސް ފާހާނާއެއްގެ ދޮރު ވައްޓާލާފައި ވަދެފައި ނުވާ ކަމަށެވެ. އަދި މި އޮޕަރޭޝަންގައި ބައިވެރިވި ފުލުހުން ބޮޑީވޯން ކެމެރާއެއް ބޭނުންކޮށްފައި ނުވާ ކަމަށެވެ.
މި އޮޕަރޭޝަން ހިންގުމުގައި ބާރުގެ ބޭނުން ކުރިގޮތުގެ ރިވިއުއެއް ހަމަޖެހިފައިވާ އުސޫލުގެ ތެރެއިން ކުރާނެ ކަމަށްވެސް ފުލުހުން ބުނެފައިވެއެވެ.