ބުޅާތަކަށް ޖެހޭ ބައްޔެއް ފެތުރޭތީ ބޭނުންވާ ފަރުވާ ވެސް ލިބޭ ގޮތަށް މާލޭގައި އުޅޭ ބުޅާތައް ރަޖިސްޓްރީ ކުރަން ފަށައިފި އެވެ.
މި ޕްރޮގްރާމް ހިންގަނީ ފީލައިން ވެލްފެއާ އޮގަނައިޒޭޝަނުންނެވެ. އެ ޖަމިއްޔާ އިން ބުނީ ބުޅާތައް ރަޖިސްޓްރީކުރަން ފެށީ އިއްޔެ ކަމަށެވެ.
އިއްޔެ ފެށި މި ޕްރޮގްރާމްގައި ދިރޭތަކެއްޗާ ބެހޭ މިނިސްޓަރު ޑރ. އައިޝަތު ރަމީލާ ވެސް ބައިވެރިވެވަޑައިގެން، ބުޅަލަކަށް ބޭސް ދެއްވައި "ގޯލްޑީ" ގެ ނަމުގައި ބުޅަލަކަށް ނަން ދެއްވައި ރަޖިސްޓްރީ ވެސް ކުރައްވާފައިވެ އެވެ.
ފީލައިން ވެލްފެއާ އިން ބުނީ ބުޅާތަކަށް ދޭ ބޭސް ހަދިޔާކޮށްފައި ވަނީ ކެއާ ފޯ ޕޯޒް ނަމަކަށް ކިޔާ ޖަމިއްޔާއަކުން ކަމަށެވެ.
އިއްޔެ އެކަނިވެސް 80 ބުޅާ ރަޖިސްޓްރީކޮށްފައިވާ އިރު، ކޮންމެ ބުޅަލެއް ރަޖިސްޓްރީ ކުރުމަށްޓަކައި ސީރިއަލް ނަމްބަރަކާ އެކު ކަރުގައި ޓެގެއް އަޅުވައި އެ ބުޅަލަކާއި ބެހޭ ހުރިހާ މައުލޫމާތެއް ފީލައިން އިން ރައްކާ ކުރާނެ އެވެ.
މާލޭގެ މަގުތައް މަތީގައި ގިނަ އަދަދަށް ބުޅޭ އުޅޭތީ މިހާރު ހުޅުމާލޭގައި އަންނަނީ ބުޅާތަކަށް ފެސިލިޓީއެއް ހަދަމުންނެވެ. އެތަނުގައި ބުޅާތަކަށް ބޭނުންވާ ވަރަށް ގިނަ ވަސީލަތްތައް ހުންނާނެ އެވެ.