ބޮލީވުޑްގެ މަޝްހޫރު ބަތަލާ ކާޖޮލްގެ ފުރަތަމަ ފިލްމު "ބޭހުދީ" ގެނެސްދިންތާ މިއަދަށް 32 އަހަރު ފުރުފައިވާތީ އެ ފިލްމުގެ ހަނދާން، އެކްޓަރު ސައިފް އަލީ ޚާނާ އެކީ ފެންނަ ވީޑިއޯއަކުން އާކޮށްފި އެވެ.
ސޯޝަލް މީޑިއާގައި ޕޯސްޓްކުރި އެ ވީޑިއޯގައި ފެންނަނީ ފިލްމު ލޯންޗްކުރަން ބޭއްވި ހަފުލާގައި ކާޖޮލް އާއި ސައިފް "ބޭހުދީ" ގެ ލަވައަކަށް ނަށާ ތަނެވެ. އަދި ނެށުން ނިމޭ ތަނުން ގިނަ ބަޔަކު އަތްތިލަބަޑި ޖަހާ އަޑު ވެސް އިވިގެންނެވެ.
ޖުލައި 31، 1992 ގައި ރިލީޒްކުރި ފިލްމަށް 32 އަހަރުވުން، ސައިފް ފެންނަ ވީޑިއޯއަކާ ކާޖޮލް ފާހަގަކުރި އިރު، ފާހަގަކުރެވޭ ކަމަކީ އެ ފިލްމުގެ ބަތަލަކީ އޭނަ ނޫންކަމެވެ. ކާޖޮލްއާ އެކީ "ބޭހުދީ" ގެ ބަތަލުގެ ރޯލު ކުޅުނީ އެ ފިލްމަށް ފަހު މާ ގިނަ ދުވަސްތަކެއް ނުވަނީސް ބޮލީވުޑުން ގެއްލުނު އެކްޓަރު ކަމަލް ސާދަނާ އެވެ.
އެކަމަކު ރާހުލް ރަވައިލް ޑައިރެކްޓްކުރި ފިލްމަކީ ކުރީގެ މަޝްހޫރު ބަތަލާ ތަނޫޖާގެ ދަރިފުޅު ކާޖޮލްއާ އާ އެއްގޮތަށް ކުރީގެ މަޝްހޫރު ބަތަލާ ޝަރުމީލާ ޓެގޯރްގެ ދަރިފުޅު ސައިފް ބޮލީވުޑަށް ނެރެން އުޅުނު ފިލްމެވެ، ސައިފާ އެކީ ފިލްމުގެ މަންޒަރުތަކެއް ނެގުމަށް ފަހު، އޭނަ ފިލްމުން ވަކިކުރީ "ޕްރޮފެޝަނަލްކަން ކުޑަވެގެން" ނެވެ.
އެކަމާ ގުޅިގެން ޝަރުމީލާ ޑައިރެކްޓަރަށް ގުޅައި، ދެވަނަ ވިސްނުމަކަށް ގޮސް، ސައިފާ އެކީ ފިލްމު ނިންމަން އެދުނެވެ. ނަމަވެސް އޭނަގެ އެ ވާހަކަ ރާހުލް ބޮލާލާ ޖަހައި، ފިލްމު ބެލުންތެރިންނަށް ގެނެސްދިނީ ކަމަލް ސާދަނާ ހިމަނައިގެންނެވެ.
"ބޭހުދީ" ކުޅުނުތާ އެތައް އަހަރެއް ފަހުން ކާޖޮލް އާއި ކަމަލް ސާދަނާ 2022 ގައި ފިލްމަކުން ފެނިފައިވެ އެވެ. އެއީ ކާޖޮލް މައިގަނޑު ރޯލެއް ކުޅުނު "ސަލާމް ވެންކީ" އިންނެވެ. އޭގައި ކަމަލް ސާދަނާ ކުޅުނީ ކުރު ސަޕޯޓިން ރޯލެކެވެ.
ފާހަގަކޮށްލެވޭ ކަމަކީ "ބޭހުދީ" ގައި ކާޖޮލްގެ މަންމަގެ ރޯލު، އޭނަގެ މަންމަ ތަނޫޖާ ކުޅުނުކަމެވެ. އެ ފިލްމު ރިލީޒްވި ކާޖޮލް އަށް 18 އަހަރެވެ.
"ބޭހުދީ" ސައިފަަށް ގެއްލި ފަހުން އޭނަ ބޮލީވުޑަށް ތައާރަފުކުރީ ޑައިރެކްޓަރު ޔާޝް ޗޯޕްޅާގެ 1993 ގެ "ޕަރަމްޕަރާ" އިންނެވެ. އެކަމަކު އެ ފިލްމަކީ މާ ކާމިޔާބު ފިލްމެއް ނޫނެވެ.
ބަތަލާ ކަރީނާ ކަޕޫރްގެ ފިރިމީހާ ސައިފް، 53، އާއި އެކްޓަރު އަޖޭ ދޭވްގަންގެ އަންހެނުން ކާޖޮލް، 49، އެކީގައި ފަހުން ފިލްމުތަކެއް ކުޅެފައިވެ އެވެ. އޭގެ ތެރޭގައި 1994 ގެ "ޔޭ ދިއްލަގީ" އާއި 1997 ގެ "ހަމޭޝާ" ހިމެނެ އެވެ.