ހަމާސްގެ ލީޑަރު އިސްމާއިލް ހަނިއްޔާ އަވަހާރަކޮށްލި މައްސަލައާ ގުޅިގެން އިޒްރޭލުގެ ކިބައިން ބަދަލު ހިފާނެ ކަމުގެ އިންޒާރު އިރާނުން ދީފި އެވެ.
އީރާންގެ އާ ރައީސް މަގާމުގެ ހުވާ ކުރެއްވުމުގެ ރަސްމިއްޔާތަށް ވަޑައިގެން އުޅުއްވަނިކޮށް ހަނިއްޔާ އަވަހާރަކޮށްލީ އޭނާ ހުންނެވި ގެޔަށް ހަމަލާ ދީގެންނެވެ. މިއީ އިޒްރޭލުގެ އަމަލެއް ކަމަށް ހަމާސް އިން ބުނާއިރު، ހަމަލާގެ ޒިންމާ އިޒްރޭލުން މިހާތަނަށް އުފުލާފައެއް ނުވެ އެވެ.
ހަނިއްޔާ އަވަހާރަކޮށްލުމުގެ ތުހުމަތު އިޒްރޭލުގެ ބޮލުގައި އަޅުވަމުން އިރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ ވިދާޅުވީ، ހަނިއްޔާ އަވަހާރަކޮށްލީ އިރާނުގެ ފަސްގަނޑުގައި ކަމުން މިކަމުގެ ބަދަލު އިޒްރޭލުގެ ކިބައިން ހިފުމަކީ އިރާނުގެ މައްޗަށް އޮތް ޒިންމާއެއް ކަމަށެވެ. އަދި އިޒްރޭލަށް ހަރުކަށި އަދަބު ދޭނެ ކަމުގެ އިންޒާރު ވެސް އާޔަތުﷲ ދެއްވި އެވެ.
ހަނިއްޔާގެ ޖަނާޒާ އިރާނުގައި ބޭއްވުމަށް ފަހު ފަސްދާނުލާނީ ހުކުރު ދުވަހު ގަތަރުގައި ކަމަށް ހަމާސް އިން ވަނީ ބުނެފަ އެވެ.
ހަމާސްގެ ސިޔާސީ ބިއުރޯގެ ވެރިއަކަށް ހަނިއްޔާ އިންތިހާބުކުރީ 2017 މޭ 6 ވަނަ ދުވަހު އެވެ. މީގެކުރިންވެސް އިޒްރޭލުން ވަނީ ހަނިއްޔާ އަވަހާރަކޮށްލުމަށް އެކިފަހަރުމަތިން މަސައްކަތް ކޮށްފަ އެވެ.
މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ގަތުލުއާންމުގައި، ހަނިއްޔާގެ ތިން ފިރިހެން ދަރިން އަދި ތިން ކާފަ ދަރިން ވެސް ޝަހީދު ކޮށްލާފައިވެ އެވެ.
އިޒްރޭލުން ފަލަސްތީނުގައި ހިންގަމުންދާ ޖަރީމާތަކުގައި ފަލަސްތީނުގެ 39,400 އަށްވުރެ ގިނަ މީހުންވަނީ ޝަހީދު ކޮށްލާފަ އެވެ. މީގެތެރެއިން ގިނައީ ކުޑަކުދިންނާއި އަންހެނުންނެވެ.