އިސްލާމީ ދައުލަތްތަކުގެ ދީނީ ވުޒާރާތަކުގެ ވަޒީރުންގެ 9 ވަނަ ކޮންފަރެންސް މައްކާގައި ފަށަން ތައްޔާރުވެއްޖެ އެވެ.
މި ކޮންފަރެންސަކީ ސަޢޫދީ އަރަބިއްޔާގެ ރަސްގެފާނު ސަލްމާނު ބިން ޢަބްދުލް ޢަޒީޒް އާލް ސުޢޫދުގެ އިސްނެންގެވުމުގެ މަތިން ބާއްވާ ކޮންފަރެންސެކެވެ.
މި މަހުގެ 4 އާއި 5 ގައި ބާއްވާ މި ކޮންފަރެންސް އިންތިޒާމުކުރަނީ ސަޢޫދީގެ އިސްލާމިކް މިނިސްޓްރީންނެވެ.
މި ފަހަރުގެ ކޮންފަރެންސްގެ މި ފަހަރުގެ މައުޟޫއަކީ "މެދުމިނުގެ އުސޫލުތައް ކުރިއެރުވުމާއި، މެދުމިނުގެ އަގުތައް ވަރުގަދަކުރުމުގައި އިސްލާމިކް މިނިސްޓްރީތަކުގެ ދައުރު" އެވެ.
މި ކޮންފަރެންސްގައި ދުނިޔޭގެ 60 އަށް ވުރެ ގިނަ އިސްލާމީ ޤައުމުތަކުގެ ދީނީ ވުޒާރާތަކުގެ ވަޒީރުންނާއި، މުފްތީންނާއި، އިސްލާމީ މަޖިލިސްތަކާއި، މުއައްސަސާތަކާއި، ޖަމްޢިއްޔާތަކުގެ ރައީސުން ބައިވެރިވެ ވަޑައިގަންނަވާނެ އެވެ. އެގޮތުން ކޮންފަރެންސްގެ މައުޟޫއާ ގުޅޭ ދިރާސާތަކުގެ މައްޗަށް މަޝްވަރާކުރުމަށް 10 ޖަލްސާ ބޭއްވިގެންދާނެ އެވެ.
އިސްލާމްދީނުގެ މެދުމިނުގެ އުސޫލުތައް ޒަމާނީ މަފްހޫމުތަކުގެ އަލީގައި ބަޔާންކުރުމާއި، ދީނީ ހައްދުފަހަނައަޅައި ދިއުމުގެ މައްސަލަތަކަށް ހައްލު ހޯދުމަށް މިކޮންފަރެންސްގައި މަޝްވަރާ ކުރެވިގެންދާނެ އެވެ. އަދި އިސްލާމްދީނާއި މުސްލިމުންނަށް ދިމާވާ އެކިއެކި ގޮންޖެހުންތަކާއި، އިސްލާމްދީނާއި މެދު ނަފްރަތު އުފެއްދުމުގެ "އިސްލާމިކް ފޯބިއާ" ގެ މައްސަލައަށް ހައްލު ހޯދުމަށް ޚިޔާލު ބަދަލުކުރެވިގެންދާނެ އެވެ.
މީގެ އިތުރުން ދީނާ ގުޅުންހުރި އެކިއެކި ދާއިރާތަކުގައި އިސްލާމީ ދުނިޔޭގެ އެކިއެކި ޤައުމުތަކުގެ ވުޒާރާތަކާއި، ޖަމްޢިއްޔާތަކާއި، މުއައްސަސާތަކުން ކޮށްފައިވާ ތަޖްރިބާތައްވެސް ހިއްސާކުރެވިގެންދާނެ އެވެ. އަދި ކީރިތި ޤުރުއާނާއި ސުންނަތުގެ އަލީގައި ޒަމާނީ ގޮތެއްގައި އިސްލާމީ ދަޢުވަތު ފުޅާކުރާނެ ގޮތްތަކާ މެދު މަޝްވަރާ ކުރެވިގެން ދާނެ އެވެ.