މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ދާއިރާތަކުގެ ބައި-އިލެކްޝަންގެ ވޯޓުލުން މާދަމާ ކުރިއަށްދާނެއެވެ.
އެމްޑީޕީ ދާއިރާތަކުގެ ބައިއިލެކްޝަން ކުރިއަށްދާނީ މާދަމާ މެންދުރުފަހު 2:30 އިން ފެށިގެން ރޭގަނޑު 9:00 އަށެވެ.
މި ބައިއިލެކްޝަނާ ގުޅޭގޮތުން އެމްޑީޕީގެ ރައީސް އަބްދުﷲ ޝާހިދު އެކްސްގައި ވިދާޅުވީ، އެމްޑީޕީއަކީ އަބަދުވެސް އެތެރޭގެ ޑިމޮކްރަސީ އެންމެ ހަރުދަނާ ޕާޓީ ކަމަށެވެ.
"މިއީ ޕާޓީ ހިންގުމުގައި މެމްބަރުންގެ ސީދާ ބަސް ބުނެވޭ، މެމްބަރުންނަށް ގޮތް ނިންމޭ ހަމައެކަނި ޕާޓީ." ޝާހިދު ވިދާޅުވިއެވެ.
ޝާހިދު ވަނީ އެމްޑީޕީގެ މެންބަރުން ނިކުމެ މި އިންތިހާބުގައި ވޯޓުލެއްވުމަށް ގޮވާލައްވާފައެވެ.
02 އޯގަސްޓް 2024 ވާ ހުކުރު ދުވަހު ކުރިއަށްގެންދާ އެމްޑީޕީގެ ބައިއިލެކްޝަންއަކީ އެ ޕާޓީގެ ގައުމީ މަޖިލީހުގައި ހުސްވެފައިވާ ދާއިރާގެ މަގާމުތަކަށް ފަރާތްތައް އިންތިހާބު ކުރުމަށް ބާއްވާ އިންތިހާބެކެވެ.
އެމްޑީޕީގެ މި އިންތިހާބުގައި ސިޓީތަކަށްވެސް ރައީސުން އިންތިހާބުކުރާނެއެވެ. އެގޮތުން މާލެސިޓީ ކައުންސިލްގެ ރައީސް ކަމަށް ވާދަކުރައްވާފައިވަނީ މާލެސިޓީ މޭޔަރު އާދަމް އާޒިމް އަދި ކުރީގެ މެންބަރު މުހައްމަދު ފަލާހުއެވެ. މީގެއިތުރުްނ ތިނަދޫ ސިޓީގެ ރައީސް ކަމަށް ކުރީގެ މެންބަރު އަބްދުލް މުޣުނީ އަދި އަހުމަދު ގައިސް ވާދަކުރައްވައެވެ.