ރާއްޖެ އިން މީހުން އުމްރާ އަށް ގެންދާ ޖަމާއަތްތަކުގެ ތެރެއިން އެންމެ ރަނގަޅަށް ހިންގާ ޖަމާއަތްތައް ކޮންމެ އަހަރަކު ވެސް ފާހަގަކޮށް އެކަމުހގެ އަގުވަޒަން ކުރަން ނިންމާފައިވާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމު އަލީ ސައީދު ވިދާޅުވެއްޖެ އެވެ.
އުމްރާ މީހުން ގެންދާ ޖަމާއަތްތަތަކުގެ މިހާރު 50 އަށް އަރާ ކަމަށް ޝަހީމު ވިދާޅުވި އެވެ.
މިނިސްޓަރު ވިދާޅުވީ އެ ޖަމާއަތްތަކާ އެކީ މަހާސިންތާއެއް ބާއްވައި، އުމްރާއަށް މީހުން ގެންދިޔުމާ ގުޅޭ ގަވައިދުތަކާ ބެހޭ މަޝްވަރާ ކުރަން ވެސް ރާވާފައިވާ ކަމަށެވެ.
"އަޅުގަނޑުމެންގެ އަމާޒެއް އުމްރާއަށް މީހުން ގެންދާ ޖަމާއަތްތަކުގެ ތެރެއިން ކޮންމެ އަހަރަކު ފަސް ނުވަތަ ހަތް ޖަމާއަތަށް ސްޓާ ދިނުން." ޝަހީމް ވިދާޅުވިއެވެ.
މިނިސްޓަރު ވިދާޅުވީ މިކަމުގެ ސަބަބުން ޖަމާއަތްތަކުން ދޭ ޚިދުމަތްތައް ވެސް ރަނގަޅު ކުރަން ބޮޑު ހިތްވަރަކަަށް ވާނެ ކަމަށާއި ސްޓާ ނުވަތަ އެވޯޑް އުމްރާ ޖަމާއަތްތަކަށް ދިނުމަކީ މިނިސްޓްރީގެ އަމާޒެއް ކަމަށެވެ.
އުމްރާ އަށް ގެންދާ ޖަމާއަތްތަކުގެ ހިދުމަތްތައް ފާހަގަކުރަން ނިންމި އިރު، މިފަދަ ބައެއް ޖަމާއަތްތަކުން މީހުން އަތުން ފައިސާ ނަގައި އޮޅުވައިލުމާއި އުމްރާ އަށް ގެންދިއުމަށް ފަހު އިހުމާލުވުން ފަދަ މައްސަލަތައް ދޭތެރެ ދޭތެރެ އިން ފެންމަތިވެ އެވެ.
މިފަދަ މައްސަލަތަކާ ހެދި މި އަހަރަކީ ހައްޖަށް ގެންދިއުމުގެ ހުއްދަ ވެސް އެއްވެސް އަމިއްލަ ޖަމާއަތަކަށް ނުދިން އަހަރެއްކަން ފާހަގަކުރެވެ އެވެ. މި އަހަރު ރާއްޖެ އިން މީހުން ހައްޖަށް ގެންްދިޔައީ ސަރުކާރުގެ ކުންފުނި، ހައްޖު ކޯޕަރޭޝަނުންނެވެ.