ބޮލީވުޑްގެ އެކްޓަރު ވަރޫން ދަވަންގެ ފުރަތަމަ ވެބް ސީރީޒް "ސިޓަޑެލް: ހަނީ ބަނީ" ޕްރީމިއާކުރާ ތާރީހު އިއުލާންކޮށް، އޭގެ ޓީޒާ ޓްރެއިލާ މިއަދު ދައްކާލައިފި އެވެ.
އެމެޒޯން ޕްރައިމް ވީޑިއޯ އިން ނޮވެމްބަރު 7 ގައި ޕްރީމިއާ ކުރަން ހަމަޖެހިފައިވާ މި ސީރީޒަކީ "އެވެންޖާސް އެންޑްގޭމް" ގެ ޑައިރެކްޓަރުން ކަމަށްވާ އެންތަނީ އާއި ޖޯ ރުސޯ މިދިޔަ އަހަރު ޕްރިޔަންކާ ޗޯޕްޅާ އާއި ރިޗަޑް މެޑެން ހިމަނައިގެން އެމެޒޯން ޕްރައިމަށް ގެނައި ސީރީޒް "ސިޓަޑެލް" އާ ގުޅުވައިގެން ހަދާފައިވާ ސީރީޒެކެވެ.
"ސިޓަޑެލް: ހަނީ ބަނީ" ޑައިރެކްޓްކުރީ "ފެމިލީ މޭން" ފަދަ ކާމިޔާބު ސީރީޒްތައް ގެނެސްދީފައިވާ ރާޖް އެންޑް ޑީކޭ އެވެ.
ވަރޫންއާ އެކީ މި ސީރީޒްގެ ބަތަލާގެ ރޯލު ކުޅެފައި ވަނީ ދެކުނުގެ މަޝްހޫރު ބަތަލާ ސަމަންތާ ރޫތު ޕްރަބޫ އެވެ. ވަރޫންގެ ފުރަތަމަ ވެބް ސީރީޒް ގެނެސްދޭ ތާރީހު އިއުލާންކުރި، އޭނަގެ ކުރިއަށް އޮތް ފިލްމަކީ ޑިސެމްބަރު 25 އަށް ތާވަލުކޮށްފައި އޮތް އެކްޝަން ޑްރާމާ "ބޭބީ ޖޯން" އެވެ.