މިހާ ހަޔާތް ކުޑަ ސަރުކާރެއް މިހާތަނަށް ނުދެކޭ ކަމަށް ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއިލް ނަސީމް ވިދާޅުވެއްޖެ އެވެ.
އެމްޑީޕީން ރޭ ބޭއްވި ހަރުގެ ޖަލްސާގައި ވާހަކަދައްކަމުން މީކާއިލް ވިދާޅުވީ މި ސަރުކާރުން ރާވައިގެން ސިޔާސީ ނިޒާމަށް މީހުން ފޫހިކުރުވަން އިންތިޒާމު ވެގެން ހަރަކާތްތަކެއް ހިންގަމުންދާތަން ފެންނަ ކަމަށާއި މިކަމުގެ ހެކިތައް ޕީއެންސީގެ ހަރުގެ ޖަލްސާތަކުން ފެންނަ ކަމަށެވެ. ރައްޔިތުން ސިޔާސީ ނިޒާމާއި މެދު ފޫހިވާ މިންވަރަކަށް ސަރުކާރަށް ވައްކަން ކުރަން އަދި އެހެން ނާޖާއިޒު ފައިދާތައް ހޯދަން ވެސް ފަސޭހަވާ ކަމަށް މީކާއިލް ވިދާޅުވި އެވެ.
މި ސަރުކާރުން ދައްކާ ވާހަކަތަކާއި އަމަލާއި ދިމާ ނުވާ ކަމަށާއި ޑޮލަރު ރޭޓް ދަށްކުރުމާއި ސިޔާސީ ފިކުރު ހިޔާލު ތަފާތުވުމުން ވަޒީފާ އިން ވަކިނުކުރާނެ ކަމަށް ބުނެ ދެއްކި ވާހަކަތަކަކީ ވެރިކަމަށް އަންނަން ވެގެން ހެދި ރޯ ބުހުތާނު ދޮގުތަކެއް ކަމަށްވެސް މީކާއިލް ވިދާޅުވި އެވެ.
"މިހާ ލަދުކުޑަ، މިހާ ހަޔާތް ކުޑަ ސަރުކާރެއް އަދި މިހާ ފާޅުގައި ދޮގު ހަދަމުން، ދިވެހި ރައްޔިތުން މި ސިޔާސީ ނިޒާމާއި މެދު ފޫހި ކުރުވަމުންދާ ސަރުކާރެއް އަޅުގަނޑުމެން އަދި މި ފެންވަރަކަށް ނުދެކެން،" މީކާއިލް ވިދާޅުވި އެވެ.
މީކާއިލް ވަނީ ރައްޔިތުންގެ މަޖިލީހުގެ ޕީއެންސީ މެންބަރުން މިހާރު ޚިދުމަތް ކުރަނީ ރައްޔިތުންގެ ބަދަލުގައި ރައީސް ޑރ. މުޙައްމަދު މުއިއްޒަށް ކަމަށްވެސް ތުހުމަތު ކުރައްވާފަ އެވެ. އަދި ޕީއެންސީގެ މަޖިލިސް މެމްބަރުންގެ އަމާޒު މިހާރު ހުރީ ރައީސް މުއިއްޒުގެ ވެރިކަން ދާއިމަށް ރާއްޖޭގައި ދެމިގެންދާނެ ގޮތަކަށް އިންތިޒާމު ކުރަން ކަމަށްވެސް ވިދާޅުވި އެވެ.