އިސްލާމިކް މިނިސްޓްރީން ކަންކުރާނީ އަދާލަތު ޕާޓީން އަންގާ ގޮތަކަށް ނޫން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
ޝަހީމް މިހެން ވިދާޅުވީ ހަމާސްގެ ލީޑަރު އަދި ފަލަސްތީނުގެ ކުރީގެ ބޮޑު ވަޒީރު އިސްމާއީލް ހަނިއްޔާގެ މައްޗަށް ރާއްޖޭގައި ޣައިބަށް ކަށުނަމާދު ކުރުން އިހުތިޔާރީ ކޮށްލުން ބަލައެއް ނުގަނެވޭނެ ކަމަށް ކުރީގެ އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވުމާ ގުޅިގެންނެވެ.
އެކަމާ ގުޅިގެން ޝަހީމް ވިދާޅުވީ އިސްލާމިކް މިނިސްޓްރީން ކަން ކުރާނީ އަދާލަތުން އަންގާ ގޮތަކަށް ނޫން ކަމަށާއި ކަންކަން ކުރާނީ އިލްމުވެރިންގެ ފުރިހަމަ މަޝްވަރާއާއެކު ގުރުއާނާއި ސުންނަތާއި އެއްގޮތަށް ކަމަށެވެ.
"ފަލަސްތީނުގެ ހައްގުގައި އަބަދުވެސް ދެމި ތިބޭނަން،" ޝަހީމް ވިދާޅުވި އެވެ.
މީގެއިތުރުން ޝަހީމް ވަނީ ޣައިބަށް ކަށުނަމާދު ކުރުމަކީ ވާޖިބެއްތޯ ވެސް ސުވާލު ކުރައްވާފަ އެވެ. އަދި އެކަން ވާޖިބުވާ ދަލީލެއް ދެއްކުމަށާއި ދީނީ ކަންކަން ސިޔާސީ ކުރުމަކީ ވަރަށް ބޮޑު ނުބަޔެއް ކަމަށާއި ސަރުކާރާއި މެދު ނަފްރަތު އުފައްދަން ކުރާ މަސައްކަތް ހުއްޓާލުމަށް ވެސް ޝަހީމް ވަނީ ކުރީގެ އިސްލާމިކް މިނިސްޓަރަށް ގޮވާލާފަ އެވެ.