ވާދަވެރި އެހެން ކުންފުނިތަކާ ހިލާފަށް އެމެރިިކާގެ މަޝްހޫރު ޗިޕް ކުންފުނި، އިންޓެލްގެ ފައިދާ މި އަހަރު އިތުރުވަމުން ނުދާތީ މުވައްޒަފުންތަކެއް މަދުކުރަން ނިންމައިފި އެވެ.
އެ ކުންފުނިން ބުނީ މިފަދަ ސަބަބުތަކާ ހެދި ހަރަދުތައް ކުޑަކުރަން އަޅާ ފިޔަޅެއްގެ ގޮތުން 15،000 އަށް ވުރެ ގިނަ ވަޒީފާ މަދުކުރަން ނިންމާފައިވާ ކަމަށެވެ. މިކަން އިންޓެލް އިން އިއުލާންކުރި ފަހުން ކުންފުނީގެ ހިއްސާގެ ވިޔަފާރި އަށް 20 ޕަސެންޓްގެ ކުރިއެރުމެއް ވެސް އައެ އެވެ. ނަމަވެސް ފަހުން ހިއްސާގެ ވިޔަފާރި ވެސް ދަށްވެފައިވާ ކަމަށް މީޑިއާތަކުން ބުނެފައިވެ އެވެ.
މި އަހަރު ފެށުނީއްސުރެ އިންޓެލްގެ ވިޔަފާރި އަށް ކުރިން ލަފާކުރި ވަރުގެ ކުރިއެރުމެއް ނާދެ އެވެ. އެގޮތުން ފާއިތުވި ދެ ކުއާޓަރުގައި ވެސް، ކޮންމެ ކުއާޓަރެއްގައި ވިޔަފާރި ޕަސެންޓަކަށް ދަަށްވެފައިވާ ކަމަށް ބުންޏެވެ.
އިންޓެލްގެ މުވައްޒަފުންނަށް ޗީފް އެގްޒެކެޓިވް ޕެޓް ގެލްސިންގާ ފޮނުއްވި މެމޯއެއްގައި ވިދާޅުވީ ލަފާކުރި ގޮތަށް މި އަހަރު ކުންފުންޏަށް ފައިދާވަމުން ނުދާ ކަމަށެވެ. އެހެންވެ މި ދަނޑިވަޅުގައި "އުނދަގޫ" އަދި "ބޮޑެތި" ނިންމުންތަކެއް ނިންމަން ޖެހިފައިވާ ކަމަށް ވިދާޅުވި އެވެ.
އެގޮތުން މުވައްޒަފުންތަކެއް މަދުކުރުމަކީ މި ހާލަތުގައި އަޅަން މަޖުބޫރު ފިޔަވަޅެއް ކަމަށް ގެލްސިންގާ ވިދާޅުވި އެވެ.
"ކުރީގެ ދެ ކުއާޓަރާ ހިލާފަށް ފަހު ކުއާޓަރުގެ ހާލަތު އަދި ވަކިން ގޯސްވާނެ ކަމަށް އަންދާޒާ ކުރެވެނީ." އޭނަ ވިދާޅުވި އެވެ.
އެހެންވެ އިންޓެލް މިހާރު ވަނީ މި ދަނޑިވަޅުގައި އިންވެސްޓްމަންޓް ޕްލޭންތައް މަޑުޖައްސާލާއި ހިއްސާގެ ފައިދާ ނުބަހަން ވެސް ނިންމައިފަ އެވެ.
މީގެ 56 އަހަރު ކުރިން ޖުލައި 18، 1968 ގައި ވުޖޫދަށް އައި އިންޓެލްގެ މުވައްޒަފުންގެ އަދަދު 124،800 އަށް ވުރެ ގިނަ އެވެ.
ޗިޕް އުފައްދާ ކުންފުނުތަކުގެ ތެރެއިން އިންޓެލްއާ އެންމެ ވާދަވެރި ކުންފުންޏަކީ އެންވިޑިއާ އެވެ. މިހާރު އާޓިފިޝަލް އިންޓެލިޖެންސް (އޭއައި) އަށް ވެސް ވަރަށް ބޮޑަށް ބަރޯސާވާ އެ ކުންފުންޏަށް މާލީ މާ ބޮޑު ދަތިކަމެއް މި އަހަރަކު ކުރިމައްޗެއް ނުވާ ކަމަށް މީޑިއާތަކުން ބުނެ އެވެ.