ބޮލީވުޑްގެ ޒުވާން ބަތަލާ ތާރާ ސުތާރިއާ މިހާރު އާ ބައިވެރިޔަކު ހޯދާފައިވާ ކަމަށް ރިޕޯޓްތައް ބުނެފި އެވެ.
މީޑިއާތަކުން ބުނީ 2019 ގެ "ސްޓޫޑެންޓް އޮފް ދި އިޔާ 2" އިން ބޮލީވުޑަށް ނުކުތް 28 އަހަރުގެ ބަތަލާ މިހާރު ރައްޓެހިވެގެން އުޅެނީ އެކްޓަރު އަރުނަދޯއި ސިންގްއާ ކަމަށެވެ. އޭނަ އަކީ ކުރިން ކައިވެންޏެއްކޮށް، އެ ކައިވެނި ރޫޅިފައިވާ މީހެކެވެ.
އެހާ މަޝްހޫރު ނޫން އެކްޓަރެއްގެ ގޮތުގައި ފާހަގަކުރެވޭ 41 އަހަރުގެ އަރުނަދޯއި ކުޅެފައިވާ ފިލްމުތަކުގެ ތެރޭގައި ސޯނަމް ކަޕޫރްގެ "އައިޝާ"، ސަނީ ލިއޯންގެ "ޖިސްމު 2"، ވަރޫން ދަވަންގެ "މޭ ތޭރާ ހީރޯ" އަދި ރިތިކް ރޯޝަންގެ "މޮހެންޖޮ ދާރޯ" ހިމެނެ އެވެ.
އަނުރަދޯއިގެ އެންމެ ފަހުން ފެނިފައިވާ ފިލްމަކީ 2018 ގެ "ބްލެކްމެއިލް" އިންނެވެ.
ތާރާ އާއި އަރުނަދޯއިގެ ލޯބީގެ ވާހަކަ މިހާރު ދެކެވެމުން އަންނަ އިރު، ތާރާ އެންމެ ފަހުން ރައްޓެހިވެގެން އުޅުނީ އެކްޓަރު އާދާރް ޖެއިން، 28، އާ އެވެ. އޭނަ އަކީ މަޝްހޫރު އެކްޓަރު ރަންބީރް ކަޕޫރްގެ ކަޒިންއެކެވެ. ތާރާ އާއި އާދާރު ކައިވެނި ވެސް ކުރަން އުޅޭކަމުގެ އަޑުތަކެއް އަރާފައި ވަނިކޮށް އެ ދެ މީހުން ރުޅިވީ 2022 ގަ އެވެ.
ތާރާގެ އެންމެ ފަހުގެ ފިލްމަކީ މިދިޔަ އަހަރުގެ "އަޕޫރްވާ" އެވެ.