ގާނޫނު ތަންފީޒު ކުރުމުގައި ވަކި މީހެއް އިސްތިސްނާ ނުވާނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.
މިނިސްޓަރު އިހުސާން "އެކްސް" ގައި ކުރެއްވި ޕޯސްޓެއްގައި ވިދާޅުވީ ރައީސް ޑރ. މުހައްމަދު މުއިއްޒު އަންގަވާފައިވަނީ ގާނޫނު ތަންފީޒު ކުރުމުގައި ވަކި މީހެއް އިސްތިސްނާ ނުވަތަ ހާއްސަ ނުކުރުމަށް ކަމަށާއި އެންމެންނަށް ވެސް ހަމަހަމަކޮށް ގާނޫނު ތަންފީޒު ކުރުމަށް ކަމަށެވެ.
"ފުލުހުން އަދި އެހެން ތަންފީޒީ އިދާރާތަކުން އެގޮތުގައި ރާއްޖޭގެ ގާނޫނުތައް ތަންފީޒު ކުރާނެ،" އިހުސާން ވިދާޅުވި އެވެ.
އިހުސާން މިހެން ވިދާޅުވެފައިވަނީ މާލޭގެ މަގުތަކުން ގިނަ އަދަދެއްގެ ވެހިކަލް ޓޯ ކުރަމުންދާ މައްސަލައިގައި ހިތް ހަމަނުޖެހުން ފާޅު ކުރުމުގެ ގޮތުން ރޭ މާލޭގައި އިހުތިޖާޖެއް ބާއްވާފައިވާ ދަނޑިވަޅެއްގަ އެވެ.
ފުލުހުން ޓޯ ކުރި ވެހިކަލްތަކުގެ ތެރޭގައި ހުޅުމާލޭގެ ސެންޓްރަލް ޕާކު ސަރަހައްދުގައި ޕާކްކުރުން މަނާކޮށްފައިވާ ބައިގައި ޕާކްކޮށްފައި ހުރި 10 ރޭސިން ކާރު ވެސް ހިމެނެ އެވެ.