އެމްޑީޕީ ޤައުމީ މަޖިލީހުގެ މާލެ ސިޓީގެ ދާއިރާގެ ރައީސްކަމުގެ މަގާމު މާލޭގެ މޭޔަރު އާދަމް އާޒިމް ކާމިޔާބު ކުރައްވައިފި އެވެ.
މި އިންތިހާބު އާޒިމް ބޮޑު ތަފާތަކުން ކާމިޔާބު ކުރެއްވީ މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު އާއި ވާދަކޮށެވެ. މި އިންތިހާބު ކާމިޔާބު ކުރުމާ ގުޅިގެން ސޯޝަލް މީޑިއާގައި އެމްޑީޕީގެ އާންމު މެމްބަރުން އަންނަނީ އާޒިމަށް މަރުހަބާ ކިޔަމުންނެވެ.
އެމްޑީޕީގެ ދާއިރާތަކުގެ ބައި-އިލެކްޝަންއަކީ އެ ޕާޓީގެ ގައުމީ މަޖިލީހުގައި ހުސްވެފައިވާ ދާއިރާގެ މަގާމުތަކަށް ފަރާތްތައް އިންތިހާބު ކުރުމަށް ބޭއްވި އިންތިހާބެކެވެ.
އެމްޑީޕީގެ ގައުމީ މަޖިލީހުގައި ހިމެނެނީ ޕާޓީގެ ޗެއާޕާސަން، ރައީސް، ޕާލިމަންޓްރީ ގްރޫޕުގެ މެންބަރުން، ދާއިރާތަކުގެ ރައީސުން، ޗެއާޕާސަންގެ ނައިބު (އިދާރީ) އާއި ޗެއާޕާސަންގެ ނައިބު (މާލީ)، ޒުވާނުންގެ ހިތްވަރުގެ ރައީސް އަދި އިސްލާމީ މަޝްވަރާ މަޖިލީހުގެ ރައީސް އެވެ.