ކުރީގެ ރައީސް އަބްދުﷲ ޔާމީންގެ ފެންވަރު ދަށުދަރަޖައަކަށް ދިޔުމަކީ ލަދުވެތި ކަމެއް ކަމަށް ބާރަށު ދާއިރާގެ މެމްބަރު އިބްރާހިމް ޝުޖާއު ވިދާޅުވެއްޖެ އެވެ.
ޝުޖާއު މިހެން ވިދާޅުވީ ޕީއެންއެފް އިން ބޭއްވި ޖަލްސާއެއްގައި ރައީސް ޑރ. މުއިއްޒު އާއި އެމަނިކުފާނުގެ އަނބިކަނބަލުންނާއި ގުޅުވައިގެން ކުރީގެ ކޮމިއުނިކޭޝަން މިނިސްޓަރު މުހައްމަދު މަލީހު ޖަމާލު ދެއްކެވި ޒާތީ ވާހަކަތަކަކަށް ޔާމީން ހިތްވަރު ދެއްވުމާ ގުޅިގެންނެވެ.
އެކަމާ ގުޅިގެން ޝުޖާއު ވިދާޅުވީ ޔާމީންގެ ފެންވަރު މިހާ ދަށުދަރަޖައަށް ދިއުމަކީ ލަދުވެތި ކަމެއް ކަމަށާއި މިއަށް ކިޔަނީ ޒާތީވުން ކަމަށެވެ. އަދި ޕީއެންސީން އިދިކޮޅުގައި ތިބިއިރު އެމްޑީޕީން ޔާމީންގެ ޒާތީ ކަންކަމާ ނުބެހޭ ވަރަށް ރައީސް މުއިއްޒުގެ ޒާތީ ދިރިއުޅުމާ ޔާމީން ބެހި މަލާމާތް ކުރުމުން އެވެއްޓެނީ ތިމާގެ އަގު ކަމަށްވެސް ޝުޖާއު ވިދާޅުވި އެވެ.
ރައީސް ޔާމީންގެ ފެންވަރު މިހާ ދަށުދަރަޖައަށް ދިއުމަކީ ލަދުވެތި ކަމެއް.މިއަށް ކިޔަނީ ޒާތީވުން.
އަޅުގަނޑުމެން އިދިކޮޅުގައި ތިބި އިރު MDP ރައީސް ޔާމިންގެ ޒާތީ ކަންކަމާ ނުބެހޭ ވަރަށް ރައީސް މުޢިޒުގެ ޒާތީ ދިރިއުޅުމާ ރައީސް ޔާމީން ބެހި މަލާމާތް ކުރުމުން އެވެއްޓެނީ ތިމާގެ އަގު. pic.twitter.com/imfqwXj39f— Ibrahim Shujau (@IbrahimShujaau) August 2, 2024
ޤައުމުގެ އިޖުތިމާއީ ފޭރާން ވީދި، އެކަކު އަނެކަކަށް ކުރާ އިޚްތިރާމާއި ގަދަރު ނެތިދަނީ ވެރިކަން ކޮށްފައި ތިއްބަވާ ބޭފެޅުން އެކަމަށް ދަހިވެތިވެފައިވާ މިންވަރު ބޮޑުކަމުން ކަމަށް ގިނަ ރައްޔިތުން ދެކޭ ކަމަށްވެސް އޭނާ ވިދާޅުވި އެވެ. އަދި ޒާތީ ވާހަކަ ނުދައްކާ ކެރިގެން ސިޔާސަތައް ފާޑުކިޔަން ވެސް ނުކުރޭ ކަމަށް ޝުޖާއު ވިދާޅުވި އެވެ.
"ސިޔާސަތަށް ފާޑު ކިޔޭކަށް ނެތް. ހަދަން ޖެހެނީ ހުސް ދޮގު. ވެރިކަން ގެއްލުނީ ތެދަށް ވުރެ ދޮގު ހެދޭލެއް ބޮޑުވީމަ ކަމަށް މިހާރު ޤަބޫލުކުރެވޭ،" ޝުޖާއު ވިދާޅުވި އެވެ.
ޕީއެންއެފް އިން ކޮންމެ ހަފްތާއަކު ސިލްސިލާ ގޮތެއްގައި ބާއްވަމުން އަންނަ ޖަލްސާތަކުގައި ޔާމީން ގެންދަވަނީ މި ސަރުކާރުގެ ސިޔާސަތުތަކަށް ފާޑު ވިދާޅުވަމުންނެވެ.