ދައުލަތުގެ ބެލުމުގެ ދަށުގައި ތިބި ކުދިންގެ ތެރެއިން 22 ކުއްޖަކަށް މި އަހަރުގެ މިހާތަނަށް ފޮސްޓް ނުވަތަ ރައްކާތެރި އާއިލީ ދިރިއުޅުމެއް ހޯދައިދެވިފައިވާ ކަމަށް ސޯޝަލް އެންޑް ފެމިލީ މިނިސްޓަރު ޑރ. ޢާއިޝަތު ޝިހާމް ވިދާޅުވެއްޖެ އެވެ.
ދައުލަތުގެ މީޑިއާ، ޕީއެސްއެމްގައި މިނިސްޓަރު ވިދާޅުވީ ދައުލަތުގެ ބެލުމުގެ ދަށުގައި ތި ކުދިން ފޮސްޓަކުރަން ބޭނުންވާ ފަރާތްތަކަށް އެ ފުރުސަރު ތަނަވަސްވެފައި އޮތް ކަމަށެވެ. އަދި އެގޮތަށް ކުދިން ބެލެހެއްޓުމާ މެދު އާންމުން ދެކޭ ގޮތަށް ވެސް ހެޔޮ ބަދަލުތަކެއް އަންނަކަމުންދާ ކަމަށް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ފިޔަވައްޗަށް ކުއްޖަކު ގެންނަ ހިސާބުން އެ ކުއްޖަކަށް ކޭސް ވޯކަރެއް ހަމަޖައްސައި އާއިލާއާ އަނބުރާ ހަވާލުކުރެވޭނީ ނުވަތަ ފޮސްޓަ ކުރެވޭނީ ކިހިނެއްތޯ ދެނެގަތުމަށް ގިނަ މަސައްކަތްތަކެއް ކުރަމުން އަންނަ ކަމަށެވެ. އަދި މިހާރު ފިޔަވައްޗަށް ކުދިން ގެންނަ ހިސާބުން އެންމެ ބޮޑު ސަމާލުކަން ދެވެނީ އެތާނގައި ގިނަ ދުވަހު ބެހެއްޓުމުގެ ބަދަލުގައި، އާއިލާއަކާ އަނބުރާ ހަވާލުކޮށް، އާއިލީ ވެއްޓެއްގައި ލޯތްބާއި ކުލުނާ އެކީ ބޮޑުވުމުގެ ފުރުސަތު ކުދިންނަށް ފަހިކޮށް ދިނުމަށް ކަމަށް ވިދާޅުވި އެވެ.
މިނިސްޓަރު ވިދާޅުވި ގޮތުގައި ކުރިއާ ހިލާފަށް، މިހާރު އުމުރުން ބޮޑެތި ކުދިން ވެސް ފޮސްޓަ ކުރުމަށް އާއިލާތަކުން ޝައުގުވެރި އެވެ.
މިނިސްޓަރު ވިދާޅުވީ އިތުރު 22 ކުއްޖެއްގެ ފޮސްޓަރިންގެ ކަންކަން އެކި މަރުޙަލާތަކުގައި ކުރިއަށްދާ ކަމަށެވެ.