ސަރުކާރުގެ ވަޒީފާތަކުގެ ކޯޓާގެ މައްސަލާގައި ބަންގްލަދޭޝްގައި މިދިޔަ މަހުގެ ތެރޭގައި ހޫނުވެގެން ދިޔަ މުޒާހަރާތަކުގެ ތެރޭގައި 32 އެއްހާ ކުދިން މަރުވެފައިވާ ކަމަށާއި އެކަމާ ވަރަށް ކަންބޮޑުވާ ކަމަށް ޔުނިސެފުން ބުނެފި އެވެ.
އެ ޖަމާއަތުން ބުނީ މަރުވި ކުދިންގެ ތެރޭގައި އުމުރުން 5-12 އަހަރާ ދެމެދުގެ ކުދިން ވެސް ހިމެނޭ ކަމަށެވެ.
މިކަމާ ގުޅޭ ގޮތުން ޔުނިސެފްހެ ތަރުޖަމާން މީޑިއާތަކަށް ވިދާޅުވީ މުޒާހަރާތަކުގެ ތެރެއިން މަރުވި ކުދަކުދިންނަކީ ކުޅިބަލަން މަގުތަކަށް ނުކުތް ކުދިން ކަމަށާއި މިފަދަ ހާލަތްތަތަކުގައި ކުދަކުދިންނަށް ދޭން ޖެހޭ ރައްކާތެރިކަން ދޭން ޖެހޭނެ ކަމަށެވެ.
ޔުނިސެފުން ދެކުނު އޭޝިއާ ސަރަހައްދަށް ކަނޑައަޅާފައި ހުންނަވާ ރީޖަނަލް ޑިރެކްޓަރު ސަންޖޭ ވިޖެސެކަރަ ވިދާޅުވީ މުޒާހަރާތަކުގެ ތެރޭގައި ހައްޔަރުކުރި މީހުންގެ ތެރޭގައި ވެސް ކުޑަކުދިންތަކެއް ހިމެނޭކަމުގެ މައުލޫމާތު ލިބިފައިވާ ކަމަށެވެ.
ބަންގްލަދޭޝްގެ މުޒާހަރާތަކުގައި 32 އެއްހާ ކުދިން މަރުވެފައިވާ ކަމަށް ޔުނިސެފުން ބުނުމާ ގުޅިގެން ޖޫނިއާ އިންފޮމޭޝަން މިނިސްޓަރު މުހައްމަދު އަލީ އަރަފާތު ވިދާޅުވީ އެ އަދަދަކީ ޔުނިސެފުން ކޮން ތާކުން ހޯދި މައުލޫމާތެއްކަން އެނގިވަޑައިނުގަންނަވާ ކަމަށެވެ.
"އެކަމަކު އަހަރެމެން މި އަންނަނީ މަރުވި މީހުންނާ ބެހޭ ތަހުގީގެއް ހިންގަމުން." އޭނަ ބީބީސީ އަށް ވިދާޅުވި އެވެ.
ބަންގްލަދޭޝް މުޒާހަރާތަކުގައި 200 އަށް ވުރެ ގިނަ މީހުން މަރުވެފައިވެފައިވާ އިރު، އެތައް ބަޔަކު ހައްޔަރުކޮށްފައިވެ އެވެ، އަދި އެތައް ބަޔަކަށް އަނިޔާ ވެސް ވެފައިވެ އެވެ. އެކަމާ ގުޅިގެން މިހާރު އަންނަނީ އެ މީހުންނަށް އިންސާފު ހޯދައި ދޭން ގޮވާލައި އަޑު އުފުލަމުންނެވެ.