އަންހެނުން ބާރުވެރި ކުރުވުމުގެ ގޮތުން ތަޢާރަފުކޮށްފައިވާ 100 މިލިއަން ރުފިޔާގެ "ފަށާ މަދަދު" ލޯން ސްކީމަށް ޖުމްލަ 216 އެޕްލިކޭޝަން ލިބިފައިވާ ކަމަށް ސޯޝަލް އެންޑް ފެމިލީ މިނިސްޓްރީން ބުނެފި އެވެ.
މިނިސްޓަރު ޑރ. އައިޝަތު ޝިހާމު ވިދާޅުވީ ލޯނަށް ހުޅުވައިލުމުން ރާއްޖޭގެ ހުރިހާ އަތޮޅަކުން ވެސް ލޯނަށް އެޕްލައިކޮށްފައިވާ ކަމަށެވެ.
މި ލޯން ސްކީމްގެ 25 ޕަސެންޓް ހާއްސަކޮށްފައި ވަނީ ޙާއްސަ އެހީއަށް ބޭނުންވާ ފަރާތްތަކަށެވެ.
މިނިސްޓަރު ވިދާޅުވީ އަންހެނުން ބާރުވެރިކުރުމަކީ ސަރުކާރުގެ އެންމެ ބޮޑު އެއް ވަޢުދަށް ވާއިރު، 100 މިލިއަން ރުފިޔާގެ ލޯން ސްކީމަކީ އަންހެނުންނަކީ ފުދުންތެރި އަދި އަމިއްލަ މަސައްކަތުން އުޅޭ ބަޔަކަށް ހެދުމަށް މަގުފަހިކުރުމަށް އެޅުނު މުހިންމު ފިޔަވަޅެެއް ކަމަށެވެ.
މިނިސްޓަރު ވިދާޅުވީ ބޭންކްތަކުން ލޯނު ގިނަ އަންހެނުން އެންމެ ކަންބޮޑުވާ ކަމަކީ ލޯނު ނަގާއިރު ބޭންކުގައި ރަހުނެއް ބަހައްޓަން ޖެހުމެވެ. ނަމަވެސް އެސްޑީއެފްސީން ދޫކުރާ 100 މިލިއަން ރުފިޔާ ލޯން ސްކީމު ފަރުމާކޮށްފައި ވަނީ ރަހުނަކާ ނުލައި، ފަސޭހަކަމާއެކު ލޯނު ލިބޭނެ ގޮތަށް ކަމަށް ވިދާޅުވިއެވެ.
މިނިސްޓަރު ވިދާޅުވީ ލޯނަށް އެޕްލައި ކުރި މީހުންނަށް ފަރާތްތަކަށް ލޯން ލިބޭ ހިސާބުން ފައިސާ ގެންގުޅޭނެ ގޮތް ކިޔައިދީ، އެކަން އެސްޑީއެފްސީން ގާތުން ބަލައި ބޭނުންވާ އެހީތެރިކަން ފޯރުކޮށް ދޭނެ ކަމަށެވެ.
"ފަށާ މަދަދު" ލޯން ސްކީމް ތައާރަފުކުރީ ފެބްރުއަރީ 22 ގަ އެވެ.