މާލެސަރަހައްދުގައި ކަރަންޓު ބިލު ބޮޑު ގެތަކަށް ސްޓެލްކޯގެ ޓީމުތައް ފޮނުވައިގެން ބިލު ބޮޑުވާ ސަބަބު ދެނެގަތުމުގެ މަސައްކަތް ފެށުމަށް ނިންމާފައިވާ ކަމަށް ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެއެވެ.
ސްޓެލްކޯއިން މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި ސްޓެލްކޯގެ އެމްޑީ ފަހުމީ ވިދާޅުވީ ކަރަންޓު ބިލު ބޮޑުވުމުގެ ޝަކުވާ އަބަދުވެސް ސްޓެލްކޯއަށް ލިބޭ ކަމަށާއި އެހެންނަމަވެސް މިމަހު ސްޓެލްކޯއަށް ލިބިފައިވާ ޝަކުވާ މަދު ކަމަށެވެ. ފަހުމީ ވިދާޅުވީ މިކަމުގެ ވާނުވާ ރައްޔިތުންނަށް އެނގެންޖެހޭކަމަށް ގަބޫލުކުރައްވާ ކަމަށެވެ.
ފަހުމީ ވިދާޅުވީ މިދިޔަ މަހާ އަޅާ ބަލާއިރު މިމަހު މާލޭގެ 94 އިންސައްތަ ބިލު ކުޑަކަމަށް ފާހަގަ ކުރެވޭ ކަމަށެވެ. އަދި މާލޭގެ 6 އިންސައްތަ ބިލު އިންތިހާއަށް ބޮޑުކަން ފާހަގަ ކުރެވޭ ކަމަށެވެ. މީގެއިތުރުން ހުޅުމާލޭގެ 15 އިންސައްތަ ބިލު ވަރަށް ބޮޑުކަން ފާހަގަ ކުރެވޭ ކަމަށެވެ.
ފަހުމީ ވިދާޅުވީ އިންތިހާއަށް ބޮޑުކަމަށް ފާހަގަ ކުރެވޭ ބިލުތައް ބޮޑުވާ ސަބަބު ކަސްޓަމަރުންނަށް އަދި ސްޓެލްކޯއަށްވެސް އެނގެންޖެހޭ ކަމަށެވެ. އެހެންކަމުން ބިލު ބޮޑުވާ ގޭބިސީތަކަށް ޓީމުތައް ފޮނުވައިގެން އެނާޖީ އޮޑިޓެއް ކުރަން ނިންމާފައިވާކަމަށް ވިދާޅުވިއެވެ. މިގޮތަށް ފޮނުވާ ޓީމުތަކުން، އެ ގޭބިސީތަކުގައި ހުންނަ ކޮޓަރީގެ އަދަދު، ގޭބިސީގައި ބޭނުންކުރަނީ ކޮންކަހަލަ އާލަތްތަކެއްތޯ އަދި ކަރަންޓު ބޭނުންކުރުމުގެ ހާލަތު ދެނެގަނެވޭނެ ކަމަށެވެ.
ފަހުމީ ވިދާޅުވީ މިފަދަ އޮޑިޓެއް ކުރެވެމުން ކަރަންޓި އިގްތިސާދު ކުރުމަށް ކަސްޓަމަރުންނަށް ވެސް ފަސޭހަވެގެންދާނެ ކަމަށެވެ.