ފިލްމުތަކުގައި ތަފާތު ރޯލުތަކެއް ކުޅެން ފުރުސަތެއް ނުދޭ ކަމަށާއި އޭގެ ސަބަބުން އަސްލު ހުނަރު ދައްކައި ނުލެވޭ ކަމަށް ހިންދީ ސިނަމާގެ ތަޖުރިބާކާރު ބަތަލާއެއް ކަމަށްވާ ފަރީދާ ޖަލާލު ބުނެފި އެވެ.
ވަރަށް ކުޑައިރުން ފެށިގެން ފިލްމީ މަސައްކަތް ކުރަމުން އަންނަ 74 އަހަރުގެ ބަތަލާ މީޑިއާއަކަށް ދިން އިންޓަވިއުއެއްގައި ބުނީ އޭނަ އަށް އަބަދު ވެސް ކުޅެން ލިބެނީ މަންމަ ނުވަތަ މާމަ ކަހަލަ ރޯލުތައް ކަމަށެވެ. އަދި އޭގެ ސަބަބުން މީހާގެ ކިބައިގައި ހުރި ހަގީގީ ހުނަރު ދައްކައިލަން ހުރަސް އެޅިފައިވާ ކަމަށް ބުންޏެވެ.
"އަހަންނަކަށް ނޭނގޭ ކީއްވެ ކަމެއް އަބަދު ވެސް ގިނައިން ކުޅެން ލިބެނީ މަންމަ ނުވަތަ މާމައެއްގެ ރޯލު." ބޮލީވުޑްގެ އެންމެ މަޝްހޫރު ބައެއް ތަރިންގެ މަންމައެއްގެ ރޯލު ފިލްމުތަކުގައި ކުޅެފައިވާ ބަތަލާ ބުންޏެވެ.
ފަރީދާ ފާހަގަކުރި ގޮތުގައި ބޮލީވުޑްގައި އެކްޓަރުންނަށް އަބަދު ވެސް ވަރަށް ތަފާތު ރޯލުތައް ކުޅެން ލިބެ އެވެ. އެގޮތުން އަނޫޕަމް ކޭރާއި ކުރީގެ އެކްޓަރު އަމްރިޝް ޕޫރީ ފަދަ އެކްޓަރުންނަކީ ދުވަސްވީ އެކްޓަރުންގެ ތެރެއިން އަބަދު ވެސް ތަފާތު އެކި ކަހަލަ ރޯލުތައް ކުޅެން ލިބޭ އެކްޓަރުންކަން ފާހަގަކުރި އެވެ.
"އެ މީހުންގެ ރޯލުތަކުގެ ވެރައިޓީ ވަރަށް ގިނަ. އެކަމަކު އަހަރެން ކަހަލަ ބަތަލާއިންނަށް ހަގީގަތުގައި ނުލިބޭ ތަފާތު ރޯލުތަކެއް ކުޅޭނެ ފުރުސަތެއް،" މިހާތަނަށް 200 އެއްހާ ފިލްމުގައި މަސައްކަތްކޮށްފައިވާ ފަރީދާ ބުންޏެވެ. "އެކަމަކު މިސާލަކަށް އަހަންނަށް ނެގަޓިވް ރޯލެއް ކުޅެން ލިބުނަސް ޔަގީން ހަމަ ވަރަށް މޮޅަށް ކުޅެލެވިދާނެކަން."
އޭނަ އެންމެ ފަހުން ފެނިފައި ވަނީ މެއި މަހު ނެޓްފްލިކްސް އިން ގެނެސްދިން ސަންޖޭ ލީލާ ބަންސާލީގެ ވެބް ސީރީޒް "ހީރާމަންޑީ: ދަ ޑައިމަންޑް ބާޒާރު" އިންނެވެ. އޭގައި ފަރީދާ ކުޅުނީ އެކްޓަރު ތާހާ ޝާހްގެ މާމައެއްގެ ރޯލެވެ.
ފަރީދާ އަކީ ހިންދީ ސިނަމާގެ އައިކޮނިކް އެތައް ފިލްމެއްގައ މަސައްކަތްކޮށްފައިވާ ބަތަލާއެކެވެ. އޭގެ ތެރޭގައި ރިޝީ ކަޕޫރްގެ "ބޮބީ" އާއި ޝާހްރުކް ޚާނާއި ކާޖޮލްގެ ދިލްވާލޭ ދުލްހަނިޔާ ލޭޖާއޭގޭ (ޑީޑީއެލްޖޭ) އާއި "ކުޗް ކުޗް ހޯތާ ހޭ" އާއި "ކަބީ ހުޝީ ކަބީ ޢަމް" އާއި "ދިލް ތޯ ޕާގަލް ހޭ" އަދި "ރާޖާ ހިންދުސްތާނީ" ފަދަ ފާހަގަކޮށްލެވެ އެވެ.
ފަރީދާ ޓީވީ ސިލްސިލާތަކެއް ވެސް ކުޅެފައިވެ އެވެ. އޭގެ ތެރޭގައި "ޝަރާރަތު"، "ދޭކް ބާއި ދޭކް" އަދި "ބަލިކާ ވަދޫ" ހިމެނެ އެވެ.