މި އަހަރުގެ ދެވަނަ ކުއާޓަރުގައި އެމްޓީސީސީ އަށް ލިބުނު އާމްދަނީ ދަށްވެއްޖެ އެވެ.
އެ ކުންފުންޏަށް ދެވަނަ ކުއާޓަރުގައި ލިބުނީ 497.4 މިލިއަން ރުފިޔާ އެވެ. ފުރަތަމަ ކުއާޓަރުގައި އެމްޓީސީސީގެ އާމްދަނީ އަކީ 664.4 މިލިއަން ރުފިޔާ އެެވެ.
އެ ކުންފުނިން ބުނީ ދެވަނަ ކުއާޓަރުގެ ލިބުނު އާމްދަނީ ދަށްވީ ކޭޝް ފްލޯގެ ދަތިތަކާ އެކީ އެންމެ ބޮޑު އާމްދަނީ އަށް ވަންނަ ކޮންސްޓްރަކްޝަން ސެގްމަންޓަށް އޭގެ ނޭދެވޭ އަސަރު ކުރުމުން ކަމަށެވެ. އެހެންވެ އަހަރުގެ ދެވަނަ ކުއާޓަރުގައި އެ ދާއިރާ އިން ލިބުނު އާމްދަނީ 29 ޕަސެންޓް ދަށްވެފައިވެ އެވެ.
އެމްޓީސީދސީން ބުނީ މި ފަހުން ރާއްޖެއަށް ކުރިމަތިވި ގާ ހުދުވުމުގެ މައްސަލައާ ގުޅިގެން ތަރައްޤީގެ ބައެއް މަޝްރޫޢުތައް މަޑުޖައްސާލަން ޖެހުމުން ބިން ހިއްކުމުގެ މަސައްކަތްތައް ވެސް ވަގުތީ މެދުކެނޑި އެފަދަ މަޝްރޫއުތަކުން ލިބެން ޖެހޭ އާމްދަނީ ވެސް 13 ޕަސެންޓް ދަށްވި ކަމަށެވެ. ހުއްޓާލުމާއި އެކު އެމްޓީސީސީއަށް ލިބެން ޖެހޭ އާމްދަނީގެ %13 ވަނީ ދަށްވެފައެވެ.
ކުންފުނީގެ މާލީ ހިސާބުތައް ދައްކާ ގޮތުން ދެވަނަ ކުއާޓަރުގައި ދަތުރުފަތުރުގެ ދާއިރާއިން 41 މިލިއަން ރުފިޔާ ލިބިފައިވެ އެވެ. ފުރަތަމަ ކުއާޓަރުގައި އެ ދާއިރާ އިން ލިބުނީ 39 މިލިއަނެވެ. އެހެންވެ ދެވަނަ ކުއާޓަރުގައި 4 ޕަސެންޓްގެ ކުރިއެރުމެއް ލިބިފައިވެ އެވެ.
ކަނޑުދަތުރު ފަތުރާ ގުޅޭ ތަކެތި ވެސް ވިއްކަމުން އަންނަ އެމްޓީސީސީ އަށް އެ ވިތަފާރީން ދެވަނަކުއާޓަރުގައި އެ ދާއިރާއިން 72 މިލިއަން ރުފިޔާ ލިބުނު ފުރަތަމަ ކުއާޓަރުގައި 77 މިލިއަން ރުފިޔާ ލިބުނެވެ. އެހެންވެ އެ ދާއިރާގެ އާމްދަނީން 9 ޕަސެންޓް ވެއްޓުމެއް އައިސްފައިވެ އެވެ.
މި އަދަދުތަކާ އެކީ ދެވަނަ ކުއާޓަރުގައި ކުންފުންޏަށް 54 މިލިއަން ރުފިޔާގެ ގެއްލުމެއްވެފައިވެ އެވެ.