ކަރަންޓު ބިލު ހެދުމުގައި ރިއަލް ޓައިމް ބިލިންއަށް ދިއުމުގެ ވިސްނުން ހުރިކަން ސްޓެލްކޯއިން ހާމަކޮށްފިއެވެ.
ސްޓެލްކޯއިން މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން ސްޓެލްކޯގެ އެމްޑީ ހުސައިން ފަހުމީ ވިދާޅުވީ ރީޑިން ނަގާ ދުވަހާއި ބިލް ދެވޭ ދުވަހުގެ ދެމުގައި ތަފާތު ބޮޑުކަން ފާހަގަ ކުރެވިފައިވާ ކަމަށެވެ. އެގޮތުން 25 ދުވަހާއި 30 ދުވަހުގެ ތަފާތެއް ރީޑިން ނަގާ ދުވަހާއި ބިލް ދެވޭ ދުވަހާއި ދެމެދު ހުންކަން ފާހަގަ ކުރެއްވިއެވެ.
"އެހެންމަ އަޅުގަނޑުމެން އެބަ ވިސްނަން ރިއަލް ޓައިމް ބިލިއަން އަށް ދާންވެސް. މާނައަކީ ހަމަ ރީޑިން ނަގާ ދުވަހު ވަގުތުން ވަގުތަށް ބިލް ޑެލިވާ ކުރެވޭނެ މެކޭނިޒަމްއެއް." ފަހުމީ ވިދާޅުވިއެވެ.
ފަހުމީ ވިދާޅުވީ ބިލް ޑެލިވާ ކުރެވޭ ދުވަސް ފަސްވުމުގެ މައްސަލައަކީ މިފަހުން ދިމާވި މައްސަލައެއް ނޫން ކަމަށާއި އެއީ ގިނަ ދުވަސްތަކެއް ވެފައިވާ މައްސަލައެއް ކަމަށެވެ.
ރީޑިން ނަގާތާ ގިނަ ދުވަސްތަކެއް ފަހުން ބިލް ދިއުމުން ކަސްޓަމަރުންގެ އެކިކަހަލަ ޝަކުވާވެސް އަންނަކަން ފަހުމީ ފާހަގަކުރެއްވިއެވެ. އެހެންކަމުން ރިއަލް ޓައިމް ބިލިއަންއަށް ދިއުން މުހިންމު ކަމަށާއި އެކަން ކުރާނެ ކަމަށް ވިދާޅުވިއެވެ.