ކުރީގެ ރައީސް އަބްދުﷲ ޔާމީން މި ސަރުކާރާ ދުރަށް ވަޑައިގަތީ، އެމަނިކުފާނުގެ ދަރިކަލުން ޒޭން އަބްދުﷲ ޔާމީނަށް ޓޫރިޒަމް މިނިސްޓަރުކަން ނުދިނުމުން ކަމަށް ބާރަށު ދާއިރާގެ ޕީއެންސީގެ މެންބަރު އިބްރާހީމް ޝުޖާއު ތުހުމަތު ކުރައްވައިފި އެވެ.
މިދިޔަ ބުރާސްފަތި ދުވަހުގެރޭ ޕީއެންއެފުން ބޭއްވި ޖަލްސާގައި ވާހަކަދައްކަވަމުން ޔާމީން ވަނީ މި ސަރުކާރާއި ދުރަށް ޖެހުނީ ހަދަމުންދާ ގޯސްތަކަށް ހަޖަމު ނުކުރެވިގެން ކަމަށް ވިދާޅުވެފަ އެވެ.
އެ ވާހަކަތަކަށް ރައްދު ދެއްވަމުން ޝުޖާއު ވިދާޅުވީ ޔާމީން ޕީޕީއެމް ދޫކޮށް ވަޑައިގެންނެވިއިރު، ރައީސް ޑރ. މުހައްމަދު މުއިއްޒުގެ ސަރުކާރަށް ފުރުނީ އެންމެ ހަ ދުވަސް ކަމަށެވެ.
"އެ 6 ދުވަސް ތެރޭ ސަރުކާރުން ހެދީ ކޮން ގޯހެއް؟ ތިހެން ވިދާޅު ނުވޭ! ޒެއިންއަށް ޓުއަރިޒަމް މިނިސްޓަރުކަން ނުދީގެން ނޫންތަ؟،" ޝުޖާއު ވިދާޅުވި އެވެ.
ޔާމީންގެ ވާހަކަތަކަށް ޕީއެންސީގެ އިސް ބޭފުޅުން މިއަދު ގެންދަވަނީ ސޯޝަލް މީޑިއާގައި ހޫނު ރައްދުތަކެއް ދެއްވަމުންނެވެ.
ޕީއެންއެފް އިން ކޮންމެ ހަފްތާއަކު ސިލްސިލާ ގޮތެއްގައި ބާއްވަމުން އަންނަ ޖަލްސާތަކުގައި ޔާމީން ގެންދަވަނީ މި ސަރުކާރުގެ ސިޔާސަތުތަކަށް ފާޑު ވިދާޅުވަމުންނެވެ.