މިހާރު ލައިސަންސް ވެސް ހޯދަން ހުށަހަޅާފައިވާ ރާއްޖޭގެ ފުރަތަމަ ޑިވެލޮޕްމަންޓް ބޭންކްގެ ސީއީއޯއަކަށް އައްޔަންކުރަން ދެ ބޭފުޅެއްގެ ނަން ލިބިފައިވާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެެ.
އެކަން މިނިސްޓަރު ހާމަކުރެއްވީ މިއަދު ފެށި 5 ވަނަ "މޯލްޑިވްސް އެކައުންޓެންޓްސް ފޯރަމް" ގަ އެވެެ. ނަމަވެސް އެއީ ކޮން ބޭފުޅުންނެއް ކަމެއް ހާމައެއް ނުކުރައްވަ އެވެ.
ސައީދު ވިދާޅުވި ގޮތުގައި މޯލްޑިވްސް ޑިވެލޮޕްމެންޓް ބޭންކްގެ ގަވަނިން ބޯޑުގައި ސަރަހައްދީ ފެންވަރު ފާހަގަކޮށްލެވޭ ފަރާތްތަކެއް ތިބޭނެ އެވެ.
ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން ރާއްޖޭގެ ޑިވެލޮޕްމެންޓް ބޭންކު އުފައްދާވާފައި ވަނީ މެއި މަހުގެ 16 ގަ އެވެ. އަދި އެ ބޭންކް އުފެއްދުމަށް ބޭނުންވާ ލައިންސަން ހޯދަން މޯލްޑިވްސް މަނިޓަރީ އޮތޯރިޓީ އެމްއެމްއޭ) އަށް ހުށަހެޅީ މިދިޔަ މަހުގެ 28 ގަ އެވެ.
ޑިވެލޮޕްމަންޓް ބޭންކަކީ ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިގުތިސާދީ އަދި އިޖުތިމާޢީ ތަރައްގީ އަށް އިންވެސްޓުކުރުމާއި، އުމްރާނީ ތަރައްގީ އަށް ބޭނުންވާ ފައިސާ ހޯދުމުގެ ބޭނުމުގައި އުފެއްދި ކުންފުންޏެކެވެ.
ޑިވެލޮޕްމެންޓް ބޭންކާއި އޮފްޝޯ ބޭންކިންގެ ހިދުމަތް ހިމެނޭހެން ރާއްޖޭގައި މާލީ ސިނާއަތެއް ތަރައްގީ ކުރުމަށް ޖެނުއަރީ މަހު މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީ" ގެ ނަމުގައި އިދާރާއެއް އުފައްދާފައިވެ އެވެ.