ދުނިޔޭގެ ފުރަތަމަ ލަގްޒަރީ އެއާލައިން ކަމަށްވާ ބިއޯންޑް އިން ދިވެހި ޕައިލެޓުންނަށް ފުރުސަތު ހުޅުވާލައިފި އެވެ.
އެ އެއާލައިނުން ބުނީ މިކަމަށް ޝައުގުވެރިވާ ދިވެހި ޕައިލެޓުންނަށް ފުރުސަތު ހުޅުވައިލުމަކީ އޭވިއޭޝަން ދާއިރާގައި މަސައްކަތްކުރާ ދިވެހި ޕައިލެޓުންނަށް ލިބޭނެ ވަރަށް ރަނގަޅު ފުރުސަތަކަށް ވާނެ ކަމަށެވެ.
ބިއޯންޑް އަށް އަލަށް ދިވެހި ޕައިލެޓުންނަށް ފުރުސަތު ހުޅުވައިލި އިރު، ކުރިމަތިލާން ޕައިލެޓުންނަށް ހާއްސަ ޝަރުތުތަކެއް ވެސް ހިމަނާފައިވެ އެވެ. އޭގެ ތެރޭގައި ސައްހަ މެޑިކަލް ސެޓްފިކެޓަކާ އެކީ ރާއްޖޭގެ ސިވިލް އޭވިއޭޝަން އޮތޯރިޓީ އެމްސީއޭއޭ) ގެ އޭޓީޕީއެލް ލައިސެންސް އޮތް ޕައިލެޓަކަށްވުމާއި ފާއިތުވި ތިން މަހުގެ ތެރޭގައި ދަތުރުތަކެއްކޮށްފައިވުމުގެ އިތުރަށް މަދުވެގެން 3،000 ގަޑިއިރު ފްލައިޓް ގަޑި ހަމަކޮށްފައިވުން ހިމެނެ އެވެ.
ބިއޯންޑް ދަތުރުތައް ރަސްމީކޮށް އިފުތިތާހުކުރީ މިދިޔަ އަހަރުގެ އޮކްޓޯބަރު 9 ގަ އެވެ. އަދި އޭގެ ފުރަތަމަ ދަތުރު މިދިޔަ އަހަރުގެ ނޮވެމްބަރު މަހު ބޭއްވީ ރާއްޖެ އާއި ސައޫދީ އަރަބިއްޔާއާ ދެމެދު އެވެ. ބިއޯންޑް ދަތުރުތަކަށް ބޭނުން ކުރަނީ އެއާބަސް އޭ320 މަރުކާގެ ބޯޓެވެ. މި އެއާލައިނުން މިހާރު ރާއްޖެ އަށް ޝެޑިއުލް ދަތުރުތައް ބާއްވާ ގައުމުތަކުގެ ތެރޭގައިި ސައުދީ އަރަބިއްޔާ، ޔޫއޭއީ، ޖަރުމަން، އިޓަލީ، ތުރުކީ އަދި ސްވިޓްޒަލޭންޑް ހިމެނެ އެވެ.
ބިއޯންޑް އަކީ ކުރީގެ ހެލްތު މިނިސްޓަރު ޑރ. މަރިޔަމް ޝަކީލާގެ އާއިލީ ވިޔަފާރި ކުންފުނި ސިމްޑީ އާއި ޔޫއޭއީގެ އަރަބެސްކް ގުޅިގެން އުފައްދާފައިވާ އެއާލައިނެކެވެ.