ކުދި އަދި މެދު ފަންތީގެ ވިޔަފާރިތައް ކުރިއަރުވަން މަސައްކަތްކުރާ ސަރުކާރުުގެ ކުންފުނި، ބިޒްނެސް ސެންޓަ ކޯޕަރޭޝަން (ބީސީސީ) އިން މާލޭގައި 11 ބުރީގެ އިމާރާތެއް އަޅަން ތައްޔާރުވާން ފަށައިފި އެވެ.
އެ އިމާރާތް އަޅަން ހަމަޖެހިފައި ވަނީ ޗާންދަނީ މަގަށް އިންނަ ދަނބު ގޯޅީގެ ކަންމަތީގަ އެވެ. އެތަނުގައި މިހާރު އަންނަނީ އިމާރާތުގެ އަމަލީ މަސައްކަތްތައް ފެށުމަށް ވެސް ތައްޔާރުވަމުންނެވެ.
ބީސީސީން ބުނެފައި ވަނީ މި އިމާރާތަކީ ކުދި އަދި މެދުފަންތީގެ ވިޔަފާރިތަކަށް ޖާގަ ދޫކުރުމަށާއި އޮފީސް ފަދަ ތަންތަން ހިންގުމަށް ކުއްޔަށް ޖާގަ ދޫކުރާނެ ތަނެކެވެ.
މި މަޝްރޫއު ހަވާލުކޮށްފައި ވަނީ ފެޑޯ ކޮންސްޓްރަކްޝަނާ އެވެ. ކުރިއަށް އޮތް ދެތިން ހަފުތާގެ ތެރޭގައި އަމަލީ މަސައްކަތް ފަށަން ހަމަޖެހިފައިވާ އިރު، ޕްރޮޖެކްޓް ތިން އަހަރުގެ ތެރޭގައި އެއްކޮށް ނިންމާނެ އެވެ.
ނަމަވެސް މި ޕްރޮޖެކްޓްގެ ހަރަދާ ބެހޭ މައުލޫމާތެއް ބީސީސީން ހާމަކޮށްފައެއް ނުވެ އެވެ.
އެ ކުންފުނިން މާލޭގައި 11 ބުރީގެ އިމާރާތެއް ހަދަން ނިންމި އިރު، 2022 ގައި ހުޅުމާލޭގައި ހަ ބުރީގެ "އެސްއެމްއީ ޕާކް" އެއް ހަދަން ނިންމައި އެ މަޝްރޫއު އެ އަހަރުގެ އެޕްރީލް މަހުގެ ތެރޭގައި ބީލަމަށް ވެސް ލި އެވެ.