މިހާރު އިންޑިއާގެ ގާނޫނު ހަދާ މަޖިލީހުގެ ތިރިގެ، ލޯކް ސަބާގެ މެމްބަރެއްގެ ގޮތުގައި މަސައްކަތް ކުރަމުން އަންނަ މަޝްހޫރު ބަތަލާ، ކަންގަނާ ރަނާވަތުގެ މުމްބާއީގެ އޮފީސް އިމާރާތް ވިއްކައިލަން އިއުލާންކޮށްފި އެވެ.
އޭނަގެ އަމިއްލަ ޕްރޮޑަކްޝަން ހައުސް، މަނިކަރްނިކާ ފިލްމްސް ވެސް ހިންގަމުން އަންނަ މި އިމާރާތް ހުންނަނީ މުމްބާއީގެ ބަންޑްރާގެ އެންމެ މަޝްހޫރު އެއް ހިސާބު ކަމަށްވާ ޕާލީ ހިލްގަ އެވެ. ބޮޑު މިނުގައި 3،042 އަކަފޫޓްގެ ބިމެއްގައި ހުރި ތިން ބުރީގެ އިމާރާތް ވިއްކައިލަން އިއުލާންކޮށްފައި ވަނީ 40 ކްރޯޑް ރުޕީސް (5 މިލިއަން ޑޮލަރު) އަށެވެ.
ފާހަގަކޮށްލެވޭ ކަމަކީ މި އިމާރަތާކީ އެތަނުގެ ބައެއް ހަދާފައި ވަނީ އުސޫލާ ހިލާފަށް ކަމަށް ބުނެ 2020 ގެ ސެޕްޓެމްބަރު މަހުގެ ތެރޭގައި މުމްބާއި މުނިސިޕަލް ކޯޕަރޭޝަން (ބީއެމްސީ) އިން ތަޅާލި އިމާރާތް ވެސް ކަމެވެ.
އެ މައްސަލާގައި ގެއްލުމުގެ ބަދަލަށް ދެ ކްރޯޑް ރުޕީސް ހޯދަން ބީއެމްސީގެ މައްޗަށް ކަންގަނާ ދައުވާ ވެސްކޮށް، އެ ދައުވާ ކާމިޔާބުކޮށްފައިވެ އެވެ. އެގޮތުން 2020 ގެ ނޮވެމްބަރުގައި މުމްބާއީގެ ހައި ކޯޓުން ކުރި ހުކުމްގައި ވަނީ ބީއެމްސީން އަމަލުކޮށްފައި ވަނީ އެއްވެސް އަސާސެއްގެ މައްޗަށް ބިނާކޮށް ނޫން ކަމަށާއި އެހެންވެ ގެއްލުމުގެ ބަދަލު ބީއެމްސީ ދޭން ޖެހޭނެ ކަމަށެވެ.
އިންޑިއާގެ ވެރިކަން ކުރާ ޕާޓީ، ބީޖޭޕީގެ މެންބަރެއްގެ ގޮތުގައި ކަންގަނާ ލޯކް ސަބާގައި ތަމްސީލު ކުރަނީ އޭނަގެ އުފަން ސްޓޭޓް، ހިމާޗަލް ޕްރަދޭޝްގެ މަންޑީ ދާއިރާ އެވެ.
ހަތަރު ނެޝަނަލް އެވޯޑް ހޯދާފައިވާ ބަތަލާގެ ކުރިއަށް އޮތް ފިލްމަކީ އޭނަ ސިޔާސީ މަސައްކަތަށް ނުކުތުމުގެ ކުރިން ނިންމާފައި އޮތް ފިލްމު "އިމަޖެންސީ" އެވެ. އެ ފިލްމު ސިނަމާތަކަށް ގެންނަން ތާވަލުކޮށްފައި އޮތީ އަންނަ މަހުގެ 6 ގަ އެވެ.