މާލޭގައި މިހާރު ކްރިކެޓް މުބާރާތްތައް ބާއްވަމުން އަންނަ ކުޅިވަރު އެކުވެނީގެ ޓްރެކް ދަނޑު، ކްރިކެޓް ސްޓޭޑިއަމެއްގެ ގޮތުގައި ތަރައްގީކުރުމުގެ ވިސްނުން ސަރުކާރުން ގެންގުޅޭ ކަމަށް ސްޕޯޓްސް މިނިސްޓަރު ޢަބްދުﷲ ރާފިއު ވިދާޅުވެއްޖެ އެވެ.
އިއްޔެ ނިންމައިލި "ޓީ20 ޕްރެޒިޑެންޓްސް ކަޕް" ގެ އިނާމު ދިނުމުގެ ރަސްމިއްޔާތުގައި މިނިސްޓަރު ވިދާޅުވީ ކްރިކެޓްގެ ކުރިއެރުވުމަށް އޮތް އެންމެ ބޮޑު ގޮންޖެހުމަކީ ކްރިކެޓް ކުޅުމަށް ހާއްސަ ދަނޑެއް މާލޭގައި ނެތުން ކަމަށެވެ.
ނަމަވެސް ކްރިކެޓް މުބާރާތްތަކުގެ ފޯރި ގަދަވެ، ގިނަ ޓިމްތަކަކާ އެކީ މުބާރާތްތައް ބޭއްވުމަށް އޮތް އެންމެ ބޮޑު ގޮންޖެހުމަކީ ޓީމްތަކަށް ޕްރެކްޓިސް ކުރެވޭނެ އެކަށީގެންވާ ވަސީލަތްތަކެއް ވެސް ނެތުން ކަމަށް މިނިސްޓަރު ވިދާޅުވި އެވެ.
އެހެންވެ މިކަމަށް ހައްލެއް ހޯދުން ވަރަށް މުހިއްމު ކަމަށް ރާފިއު ވިދާޅުވި އެވެ.
އޭނަ ވިދާޅުވީ ކްރިކެޓަށް ދިމާވެފައިވާ ދަތިތަކުގެ ވާހަކަތައް ރައީސް ޑރ. މުޙައްމަދު މުޢިއްޒާ ވެސް ހިއްސާކުރައްވާފައިވާ ކަމަށާއި އެހެންވެ ހައްލެއް ހޯދައި ދެއްވާނެކަމުގެ އުފާވެރި ޚަބަރު ރައީސް ދެއްވާފައިވާ ކަމަށެވެ.
"ރައީސުލްޖުމްހޫރިއްޔާ ދެއްވި އުފާވެރި ހަބަރަކީ މި ވަގުތު ކްރިކެޓް ކުޅޭ ދަނޑު، ކްރިކެޓް ދަނޑެއްގެ ސައިޒަށް ފައްތައިގެން، ކްރިކެޓް ކުޅޭނެ ގޮތަށް އިންތިޒާމް ހަމަޖައްސައި މި ތަނުގައި [ޓްރެކް ދަނޑުގައި] ސްޓޭޑިއަމެއްގެ ސިފައިގައި ހަދަން ހުއްދަ ދެއްވާނެ ވާހަކަ." މިނިސްޓަރު ވިދާޅުވި އެވެ.
އެހެންވެ އަންނަ އަހަރުގެ ތެރޭގައި އެކަން ފެށުމަށް މަސައްކަތް ކުރައްވާނެ ކަމަށް ރާފިއު ވިދާޅުވި އެވެ.