މި އަހަރު ބާއްވާ ރިޔާސީ އިންތިހާބުގައި ޑިމޮކްރެޓިކް ޕާޓީގެ ފަރާތުން ވާދަކުރައްވާ ކެންޑިޑޭޓް ކަމާލާ ހެރިސް އަށް ތާއީދު ކުރައްވާ ކަމަށް ކުރީގެ ރައީސް ޖިމީ ކާޓާ ވިދާޅުވެއްޖެ އެވެ.
އޮކްޓޯބަރު 1 ގައި 100 އަހަރު ފުރޭ ކާޓާ ވިދާޅުވީ ނޮވެމްބަރުގައި ބާއްވާ އިންތިހާބުގައި ކަމާލާ އަށް ވޯޓް ދެއްވުމުގެ އުންމީދުގައި ހުންނެވި ކަމަށެވެ. ކާޓާ އަކީ އެމެރިކާގެ ރައީސްކަން ކުރެއްވި ބޭފުޅުންގެ ތެރެއިން މިހާރު ދުނިޔޭގައި ހުންނެވި އެންމެ ދުވަސްވީ ބޭފުޅާ އެވެ.
އޭނަ ވެރިކަން ކުރެއްވީ 1977-1981 އަށެވެ. ކާޓާ އަކީ އެމެރިކާގެ 39 ވަނަ ރައީސެވެ.
ކުރިން ސިކުނޑީގެ ކެންސަރަށް ފަރުވާ ހޯއްދެވި ކާޓާ މިހާރު ގެންދަވަނީ ފުރަމޭގެ ކެންސަރަށް ފަރުވާ ހޯއްދަވަމުންނެވެ.
އޭނަ ކަމާލާ އެންޑޯޒްކުރެއްވި އިރު، އެންމެ ފުރަތަމަ ކަމާލާ އެންޑޯޒްކުރެއްވި ކުރެއްވި ރައީސަކީ ދެ ދައުރަކަށް ވެރިކަން ކުރެއްވި ބަރަކް އޮބާމާ އެވެ.
ކަމާލާ އަށް ޑިމޮކްރެޓިކް ޕާޓީގެ ރިޔާސީ ޓިކެޓް ލިބިވަޑައިގަތީ ރައީސް ޖޯ ބައިޑެން ކެމްޕޭން ވެސް ކުރެއްވުމަށް ފަހު، ރިޔާސީ ރޭހުން ވަކިވެވަޑައިގެން ނައިބު ރައީސް މަގާމުގައި ހުންނެވި ކަމާލާ އަށް އެ ފުރުސަތު ދެއްވުމުންނެވެ. މި ހަފުތާގެ ތެރޭގައި ކަމާލާގެ ރަނިންމޭޓް އިއުލާން ކުރަން ހަމަޖެހިފައިވެ އެވެ.
ރިޕަބްލިކަން ޕާޓީގެ ފަރާތުން އިންތިހާބަށް ވާދަކުރައްވަނީ ކުރީގެ ރައީސް ޑޮނަލްޑް ޓްރަމްޕެވެ.