ދެން ފިލްމު ޑައިރެކްޓް ނުކުރާނެ ކަމަށާއި އޭނަ މިހާރު "އައުޓްޑޭޓްވެއްޖެ" ކަމަށް މިހާތަނަށް ކާމިޔާބު އެތައް ގެނެސްދީފައިވާ ބޮލީވުޑްގެ ޑައިރެކްޓަރު މަހޭޝް ބަޓް ބުނެފި އެވެ.
އޭނަގެ ވާހަކައަކަށް ޑައިރެކްޓަރު ވިކްރަމް ބަޓް މިދިޔަ މަހުގެ ފަހުކޮޅު ޑިޒްނީ ޕްލަސް ހޮޓްސްޓާ އަށް ގެނެސްދިން ލޯބީގެ ބިރުވެރި ފިލްމު "ބްލަޑީ އިޝްގް" ގެ ޕްރޮމޯޝަންގެ ތެރޭގައި މީޑިއާއަކަށް ދިން އިންޓަވިއުއެއްގައި ބަޓް ބުނީ އޭނަގެ ޒަމާން މިހާރު ހިނގައްޖެ ކަމަށެވެ.
"އެހެންވެ ދެން ފިލްމެއް ޑައިރެކްޓެއް ނުކުރާނަން." ބަޓް، 75، ބުންޏެވެ.
ބަޓް އެންމެ ފަހުން ޑައިރެކްޓްކުރި ފިލްމަކީ އޭނަގެ ދަރިފުޅު، މަޝްހޫރު ބަތަލާ އާލިއާ ބަޓް ވެސް މުހިއްމު ރޯލެއް ކުޅުނު 2020 ގެ "ސަޅަކް 2" އެވެ. އެ ފިލްމުގައި ބަޓްގެ ދޮށީ ދަރިފުޅު، ޕޫޖާ ބަޓް ވެސް ހިމެނެ އެވެ.
ބަޓްގެ ދިގު ކެރިއަރުގައި މަޝްހޫރު އެތައް ފިލްމެއް ގެނެސްދީފައިވެ އެވެ. އޭގެ ތެރޭގައި "އަރުތު"، "ނާމް"، "އާޝިގީ"، "ސަޅަކް"، "ޖުނޫން"، "ދިލް ހޭ ކި މާންތާ ނެހީ"، "ހަމް ހެ ރަހީ ޕީޔާރު ކޭ"، "ގުމްރާހު"، "ޗާހަތު"، "ތަމަންނާ" އަދި "ޒަހަމް" ހިމެނެ އެވެ.