ސިމްޑީ ކުންފުނިން ހިތަދޫގައި ހިންގާ އައިއެމްޑީސީ ހޮސްޕިޓަލުން ކަރަންޓު ކަނޑާލުމާއި ގުޅިގެން ފެނަކަ ކޯޕަރޭޝަނާއި ދެކޮޅަށް ދައުވާކުރުމުގެ ގާނޫނީ ބާރާއި ހައިސިއްޔަތު އެ ދައުވާ ހުށަހެޅި، އެކުންފުނީގެ ކޯޑިނޭޓަރ އުސާމާ ހަސަން ލަތީފަށް ލިބިގެން ނުވާ ކަމަށް ހިތަދޫ މެޖިސްޓްރޭޓް ކޯޓުން ހުކުމްކޮށްފިއެވެ.
ސިމްޑީގެ ފަރާތުން އުސާމާ ކޯޓަށް ހުށަހެޅި މައްސަލައިގެ ހުކުމްގައި ވަނީ ކަރަންޓް ކަނޑާލި މައްސަލާގައި ފެނަކައިގެ މައްޗަަށް ސިމްޑީގެ ފަރާތުން ދައުވާ ކުރަނީ އެ ދައުވާ ކުރެވޭނެ ގާނޫނީ ބާރާއި ހައިސިއްޔަތު ލިބިފައިވާ ފަރާތެއް ކަމަށް ޝަރީއަތަށް ނުފެންނަ ކަމަށެވެ.
"އުސާމާ ހަސަން ލަތީފަކީ ފެނަކަ ކޯޕަރޭޝަންގެ މައްޗަށް ސިިމްޑީގެ ފަރާތުން ދައުވާ ކުރެވޭނެ ގާނޫނީ ބާރާއި ހައިސިއްޔަތު ލިބިފައިވާ ފަރާތެއްކަން ޝަރީއަތަށް ހުށަހެޅިފައިވާ ލިޔެކިޔުންތަކުން އެނގެން ނެތަތީ އާއި ދައުވާ ކުރާ އުސާމާ، ހުށަހަޅާފައިވާ މައްސަލާގައިގެން ކުރިއަށް ދާނެ ތަނެއް ނެތް ކަމަށް ކަނޑައަޅައި މި ގޮތުގެ މަތިން ހުކުމްކޮށް މި ގަޟިއްޔާ ނިންމީމެވެ." ހިތަދޫ ކޯޓުގެ މެޖިސްޓްރޭޓް މަރިޔަމް ވަހީދު ބެއްލެވި މައްސަލައިގެ ޙުކުމްގައި ވެއެވެ.
ހިތަދޫ ކޯޓުގެ އޮފިޝަލަކު އައްޑޫލައިވް އަށް މައުލޫމާތު ދެމުން ބުނިގޮތުގައި ސިމްޑީ ކުންފުނީގެ ފަރާތުން ފެނަކަ ކޯޕަރޭޝަނާއި ދެކޮޅަށް ދައުވާ ކުރުމަށް އުސާމާ ކޯޓަށް ހުށަހަޅާފައި ވާ ލިޔުންތަކުން، ދައުވާ ކުރުމުގެ ހުއްދަ ސިމްޑީ ކުންފުނީގެ ބޯޑުން އޭނާ އަށް ދީފައިވާ ކަން އެނގެން ނެތް ކަމަށެވެ.