މިދިޔަ މަހު ރިލީޒްކުރި ކަމަލް ހަސަންގެ "އިންޑިއަން 2" މި މަހުގެ 9 ގައި ނެޓްފްލިކްސް އިން ޕްރީމިއާކުރާ ގޮތަށް ހަމަޖެހިއްޖެ އެވެ.
މިދިޔަ މަހުގެ 12 ގައި ސިނަމާތަކަށް ގެނައުމުން ބެލުންތެރިންގެ ފަރާތުން މާ ބޮޑު ތަރުހީބެއް ނުލިބޭ ފިލްމަކީ ކަމަލް ހަސަނާ އެކީ ޑައިރެކްޓަރު އެސް ޝަންކަރް 1996 ގައި ގެނެސްދިން "އިންޑިއަން" ގެ ސީކްއެލް އެވެ. ބެލުންތެރިންގެ ވަރަށް ބޮޑު މަގުބޫލު ކަމެއް ހޯދި އެ ފިލްމުގެ ބަތަލާއިންނަކީ އުރްމިލާ މަޓޯންޑްކަރާއި މަނީޝާ ކޮއިރަލާ އެވެ.
"އިންޑިއަން 2" ގައި ރަކުލް ޕްރީތު ސިންގް، ސިދާތު، ޒާކިރު ހުސައިން، ޕިޔޫޝް މިޝްރާ އަދި ގުލްޝަން ގްރޯވާ ފަދަ ތަރިން ހިމެނެ އެވެ. ޖުމްލަ 250 ކްރޯޑް ރުޕީސް (30 މިލިއަން ޑޮލަރު) ގެ ބަޖެޓަކުން ހެދި ފިލްމަށް އާމްދަނީގެ ގޮތުގައި ލިބުނީ 231 ކްރޯޑް ރުޕީސް (28 މިލިއަން ޑޮލަރު) އެވެ.
"އިންޑިއަން 3" ވެސް ބެލުންތެރިންްނަށް ގެނެސްދޭން އޮތީ ނިންމައިފަ އެވެ.