އިސްލާމީ މަރުކަޒުގައި ދީނީ އިލްމުވެރިޔާ ޑރ. މުހައްމަދު އިޔާޒު ކުރިއަށް ގެންދެވި ތަފްސީރު ކްލާސްތައް ހުއްޓާލެއްވީ މީގެ މަހެއްހާ ދުވަސް ކުރިން އިޔާޒު އަމިއްލައަށް ކަމަށް ވިދާޅުވެ އިސްލާމިކް މިނިސްޓަރު ޑރ މުހައްމަދު ޝަހީމް އަލީ ސައީދު ދެއްކެވި ވާހަކަތައް އިޔާޒު ދޮގުކުރައްވައިފި އެވެ.
މި ވާހަކަތައް ދޮގު ކުރައްވަމުން އިޔާޒު "އެކްސް"ގައި ކުރެއްވި ޕޯސްޓެއްގައި ވިދާޅުވީ 2018 އިން ފެށިގެން ކޮންމެ އާދީއްތަ ދުވަހެއްގެ ރޭ މަޣްރިބް ނަމާދުގެ ފަހުން އިސްލާމީ މަރްކަޒުގައި ނަގަމުން އައި ޤުރްއާން ތަފްސީރު ކުލާސް މަސްދުވަހަށް މެދުކަނޑާލީ އޭނާގެ ދަރިފުޅަކު ބަލިވެގެން ރާއްޖެއިން ބޭރަށް ދާން ޖެހިގެން ކަމަށެވެ.
ރާއްޖެއިން ބޭރަށް ފުރުމުގެ ކުރިން މިނިސްޓްރީގެ ކަމާއި ބެހޭ މުވައްޒަފަށް އެކަން އަންގަވާފައިވާނެ ކަމަށާއި ދި އެނބުރި މާލެ އައިސް އެމުވައްޒަފަށް އެކަން އެންގި ކަމަށް އިޔާޒު ވިދާޅުވި އެވެ.
"އޭގެ ފަހުން (3/8/2024) ވަަނަ ދުވަހުގެ 14:16 ގައި އެމުވައްޒަފު އަޅުގަޑަށް ގުޅުއްވި އެވެ. ނަމަވެސް އެވަގުތު އަޅުގަޑަށް ފޯނު ނެގެން ނެތީމާ ފަހުން ގުޅާނެ ވާހަކަ މެސެޖްކުރީމެވެ. އޭގެ އިރުކޮޅެއް ފަހުން އަޅުގަނޑު އެމުވައްޒަފަށް ގުޅީމާ ވިދާޅުވީ އިސްލާމީ މަރްކަޒާއި ސަލްމާން މިސްކިތް ފިޔަވާ އެހެން މިސްކިތެއްގައި ކުލާސްތަައް ކުރިޔަށް ގެންދިޔުމަށް އަޅުގަޑު ގާތުގައި ބުނުމަށް ތިމަންނާ އަށް އެންގި ކަމަށެވެ،" އިޔާޒު ވިދާޅުވި އެވެ.
އިޔާޒު ވިދާޅުވީ އެ އަމުރު ނެރުނީ ކޮން ބޭފުޅެއްތޯ ސުވާލު ކުރުމުން އެކަން އެންގެވީ ޑެޕިއުޓީ މިނިސްޓަރ މުޠީޢު ކަމަށް އެ މުވައްޒަފު ބުނި ކަމަށެވެ. އަދި މިކަމުގެ މައުލޫމާތު އިސްލާމިކް މިނިސްޓްރީއަށް ލިޔުމުން ޙިއްސާކޮށްފައިވާނެ ކަމަށާއި އެއީ މިނިސްޓަރު ނުވަތަ މިނިސްޓްރީގެ ނިންމުމެއްތޯ ސާފުކޮށްދެއްވުމަށް އެދިފައިވީ ނަމަވެސް އެސިޓީއަށް އަދި އެއްވެސް ޖަވާބެއް ނުލިބޭ ކަމަށް އިޔާޒު ވިދާޅުވި އެވެ.
“ނަމަވެސް، ކުލާސް ހުއްޓާލީ އަޅުގަނޑު އަމިއްލައަށް ކަމަށް ދޭހަވާ ގޮތަށް މިނިސްޓަރު ދޮގު ފަތުރުއްވާތީވެ، ޙަޤީޤަތް ހާމަކުރުމުގެ ގޮތުން މިވާހަކަ ލިޔަން މަޖްބޫރުވީ އެވެ. އިސްލާމްދީނަށް ޙުރުމަތްކޮށް ހިއްތެވުމަށް މާތްﷲ ގަންދީ ހުވާކުރައްވައިގެން ހުންނަވާ މިފަދަ ދަށުދަރަޖައިގެ ޢަމަލެއް މިނިސްޓަރު ހިންގަވާތީ އެކަމާ ނުހަނު ހިތާމަކުރަމެވެ. އަދި ތައުބާވުމަށް ގޮވާލަމެވެ،" އިޔާޒު ވިދާޅުވި އެވެ.
ޢިޔާޒް ވަނީ މީގެ ކުރިންވެސް ކަމެއް ދިމާވެއްޖެނަމަ، ނުވަތަ ރަށުން ބޭރަށް ދާންޖެހިއްޖެނަމަ ދަރުސް މެދުކަނޑާލާފައި، އެނބުރި އައިސް އަލުން ފަށައިގެން ކުރިޔަށް ގެންދާ ކަމަށާއި ނަމަވެސް، މިފަހަރު އެ ޙުކުމް ބަދަލުވެގެން އުޅެނީ ޙަމާސް ޖަމާޢަތުގެ ވެރިޔާ އިސްމާޢީލް ހަނިއްޔާގެ މައްޗަށް ޣައިިބަށް ކަށުނަމާދު ކޮށްދިނުމަށް އެދުމުން، އެކަން ކުރައްވަން ކެރިވަޑައިނުގެން، އެކަމުގެ މަތިޖެއްސެވުމަށް ކުރައްވާ ސިލްސިލާ ކަންތައްތަކުގެ ދަށުން ކަމަށް ވިދާޅުވެފަ އެވެ.